DAM bekerejasama enggau ILP Miri ngatur Kelas Ngajat Iban
Sida ti bisi ati belajar tanda asal bansa Iban, Serakup Dayak Miri (DAM) deka ngatur Kelas Ngajat Iban ungkup taun 2019.
Kelas ngajat nya diatur bekekerejasama enggau Palan Latih Pengawa Industri (ILP) Miri, pengelama dua bulan berengkah ari 4 Februari nyentuk 4 April, 2019 tu berengkah ari pukul 7 malam nyentuk pukul 9 malam.
Chairman pengatur kelas tu, Jacqueline Selaka Mawar madahka kelas ngajat deka diatur ba Balai Intrim, ILP Miri, ti nyendiaka endur lantang agi ngagai bala nembiak kelas tu, kelimpah bisi perengka guna ti diguna.
Kelimpah ari nya ku iya, balai ti dikena ila dipelaba ulih nampung mayuh tubuh enti mayuh nembiak deka rejista.
Kelas pengelama dua jam nya semina diatur malam Hari Dua, Hari Tiga enggau Hari Empat aja.
“Kitai deka minta bayar ungkuo dua kategori iya nya RM25 ngagai nembiak sekula enggau nembiak mit beumur 7 ngagai 12 taun seraya RM50 ngagai sida ti ukai kaban serakup enggau sida ti beumur 13 taun enggau tuai agi,” ku iya madah ngagai Utusan Borneo ditu, kemari.
Kelas nerima penyereta indu enggau lelaki lalu genap iku sida ti nembuka latih deka diberi setipikit nyereta.
“Kelas tu ila deka diembing dua iku ti bepeneleba, siku lelaki enggau siku indu, ngajar raban sida empu.
“Nyadi chairman pengatur enggau ngarika raban DAM, aku endang meransang bala anak enggau indu Iban ti enda nemu ngajat tang bisi ati ngambi begulai enggau kami ngetanka main asal tu, tau rejista ngulu kelas ngajat tu ila,” ku iya nambah.
Iya ngaku kenyau ari kelas keterubah dipungkal DAM dalam pun taun 1990an ba Ruai Francis Loke, begunan Rumah Dayak diempu DAM, tang rambau nya nadai diatur ninting taun.
“Berengkah ari taun 2008, kami berengkah ngatur kelas tu ninting taun lalu udah meri setipikit nyereta ngagai sida ti udah tembu belajar.
“Majak mayuh peminta ari mensia mayuh ti mantaika diri rindu belajar enggau ngulu kelas ngajat tu,” ku iya.
Enda kurang mega sida ke indu gawa ngintu ruang bilik ngiri pengelandik laban ku iya, nadai mayuh orang nemu ngajat, kelebih agi sida ti udah lama diau mendam di mengeri besai.
“Dikearap kelas tu mantu komuniti Iban ngetanka main asal sida sereta ngajar penau tu ngagai rebak biak ngambika sida nemu enggau ngelala budaya enggau kelai bansa sida empu.”
“Taun tu, ILP ngemai kam bekerejasama laban sida mega bisi tuju ke sama enggau kami meransang raban biak ngamb bagi, belajarka main asal sida empu kelimpah nyendiaka sida enggau aktiviti bepengerai seraya nyeliahka sida ar ngereja ulah enda menuku,” ku iya nambah.
Kenu ku Jacqueline, kelimpah landik ngajat, mayuh ex-penyereta kelas tu ngamb bagi mantaika main asa nengah raban sida empu lalu bisi mega sida ngajar orang ngajat enggau muka kelas sida empu.
Penerang silik, mensia mayuh ti bisi ati tau ngambi pom penyereta ba opis Rumah Dayak tauka opis ILP Mir tauka telefon nuju Jacqueline empu ba lumur 016-8786205 Kitty Janggot ba lumur 085435467 ( Rumah Dayak) Sayona tauka Mei ba lumur 085-644387 (ILP Miri) maya jam opis gawa.