Main asal Belikan deka diajar ba ASADIA
Belikan ke nyadi siti main asal Iban ti udah lama enda didinga deka berengkah diajar Akademi Serakup Dayak Iban Sarawak(ASADIA).
Nitihka penerang ketuai ASADIA Mabong Unggang, belikan sebengkah perengka ke betali nyauka sebaka enggau sape deka diajar dalam bulan Januari tu.
Ku iya lebuh dikerandau bedau lama tu tadi, ba taun 80 an kelia tebah belikan mengkang didinga ba RTM bagi Iban.
Kelimpah ari nya, iya mega madah nerima saup sereta sukung ari Dato Sri Edmund Langgu, iya nya siku orang ke ngembuan mayuh penau ba sentang main asal Iban.
“Diatu ASADIA benung ngaga sekeda perengka belikan ngambi bisi dikena ngajar. Perengka tu betali lalu nyauka baka sape.
“ASADIA keran ngidupla main asal ke dikumbai belikan ketegal nya endang sigi amat main asal kitai Iban kelia,’ ku Mabong seraya madah kelas nya deka diatur berengkah 27 Januari .
Barang sapa ti bisi pengerindu ngulu kelas belikan tau ngerijista diri ba Mabong nengah lumur telefon 0126925562 enggau Ngo Hawing 01119891420.
Ngenang kaul ke sama, iya mega madah kelas betabuh, ajat lelaki, kuntau enggau tabuh ngambi indu ASADIA deka mega diatur ba bulan Januari tu.
Ku iya, 14 iku orang udah ngerijista diri enggau kelas betabuh renggat ke 13 lalu deka diatur di Indu opis SADIA di Kota Sentosa Kuching.
Kelimpah ari nya, iya madah ASADIA deka berengkah ngatur kelas Ajat Iban Indu kelas nusuk marek enggau ngaga tanggu sereta kelas gendang pampat ba bulan Februari tu.