Projek MPP semina deka diberi ngagai kunteriktor gred A
Opis Kunsil Kandang Padawan ( MPP) jemah ila semina deka meri projek ngagai kunteriktor gred A aja.
Chairman MPP Lo Khere Chiang madah juluk nya ulih dijapai dalam timpuh ke semak laban diatu opis kunsil udah bisi mayuh kunteriktor gred A.
“Aku ngarap ba siti hari jemah alai aku mega chukup pechaya pekara tu deka nyadi. Kunteriktor ti ngereja projek MPP semina diberi ngagai kunteriktor gred A, nadai kurang ari gred A.
“Aku keran deka meda pekara tu nyadi ba MPP, raban kunteriktor gred A deka nembuka projek enggau manah,’ku iya ba aum pengarang berita di MPP ditu, kemari.
Dulu agi ari nya, iya ngulu pengawa nyain kunterik ninting taun sereta deklarasyen nembuka projek enggau manah ari raban kuntrektor MPP.
Lo nambah, MPP udah meratika kereja raban kunteriktor kenyau lima taun ke udah lalu ari nya sida nentuka gred tetiap kuntrektor.
Ku iya ke mega Kaban Kunsil Nengeri(ADUN) Batu Kitang, dalam timpuh lima taun tu, kitai udah matih raban kunteriktor alai diatu sida udah ba gred A enggau B.
‘Sebedau tu kitai bisi gred A, B, C engga D. Udah tentu gred D sigi enda dikena agi laban kitai bisi ngena gred C mega.
“Tang diatu MPP semina nguna kuteriktor gred A enggau B lalu aku berani madah sida tu ulih nembuka projek enggau manah sereta ngangkatka nama MPP,”ku iya.
Ngenang kaul ke sama, Lo madah MPP ngemeranka chara kereja projek ke diberi ngagai kunteriktor ti meri rega tinda ke pemadu baruh.
Taja pia ku iya, pekara nya enda sebarang laban kunteriktor gred C sigi enda diterima agi taja pan sida meri rega tinda ke pemadu baruh.
“Kitai ukai semina deka ke rega tinda ke baruh, aku deka madah enggau terang laban kitai beratika ari sukut bukai.
“Nadai mih guna meri ngagai kunteriktor ti mantaika tinda ke pemadu baruh enti kunteriktor nya enda ulih nembuka projek enggau manah.
“Perundingka jemah ila enti kitai semina meri projek ngagai kunteriktor gred A, rega tinda enda murah ketegal kunteriktor gred A nembuka projek enggau manah nengah rega ke manah mega,” ku iya.