73 kunteriktor MPP nyain kunterik, deklarasyen sumpah nembuka projek ungkup taun 2019
Sepenyampau 73 bala kunteriktor gred A enggau B Opis Kunsil Kandang Padawan ( MPP) kemari nyain kunterik sereta deklarasyen sumpah deka nembuka projek ke diberi enggau manah ungkup taun 2019.
Pengawa nya dikemujur ba mua Chairman MPP Lo Khere Chiang enggau raban pemesai MPP ke bukai.
“Raban kunteriktor tu deka nyaga imej kunsil (MPP) ninting maya ke alai kitai bisi siti tim kunteriktor ke manah ti ngembuan runding meratka kunsil,’ ku iya ba aum pengarang berita tembu pengawa nya.
Iya ke mega Kaban Kunsil Nengeri( ADUN) Batu Kitang nambah pekara nya berat alai MPP deka ngetuka kunterik kuntrektor ti enda nembuka projek enggau manah.
“Kelimpah ari nya, kuntrektor nya mega deka diukum mata duit lalu enda dikemendar ngambi bagi ngerebut tinda projek MPP dalam timpuh 2 taun,’ ku iya.
Lo nambah bisi 3 bengkah pengawa ke diberi MPP ngagai kuntrektor iya nya kereja ba kategori injiniring, landskap enggau kereja ke bekait enggau pengerai mensia mayuh.
Ba kategori injiniring ku iya, kereja bekait enggau pengawa ngaga tauka ngintu jalai, sereta nyendia infrastruktur.
“Ungkup kategori pengerai mensia mayuh, kereja bekait enggau pengawa ngintu pemeresi makit, ngambi uras, nebang kayu sreta ke bukai.
“Ba sentang landskap, kereja bekait enggau taman bungai, palan pemerindang nembiak sereta ke bukai,’ku iya.
Ngenang kaul ke sama, Lo madah MPP ba taun 2018 udah ngagihka 270 projek ngagai bala kunteriktor.
Ku iya, semua nya begunaka agih belanja enda kurang ari RM20 juta.