Kompleks opis perintah Bagi Menua Serian deka berengkah digaga enda lama agi

Utusan Borneo (Sarawak) - - Berita Iban -

Kereja ngaga kompleks opis perintah Bagi Menua Serian ti dianti ngelama tu dipelaba berengkah digaga enda lama agi pengudah projek nya ditinda ngagai pemaju.

Menteri Pelajar, Sains enggau Pansik Teknologi Dato Sri Michael Manyin Jawong madahka kompleks perintah nya ditimpuh deka tembu enggau sedia dikena dalam dua taun digaga.

Manyin, megai pangku pengawa besai di Serian ti diangkat nyadi bagi menua dalam taun 2014, madahka mayuh orang udah nanyaka status projek nya ti dikemendarka kepala menteri sebedau tu, niang Pehin Sri Adenan Satem dalam bulan April 2014 lalu pengawa nasih tanah dipenyadika Kepala Menteri diatu, Datuk Patinggi Abanb Johari Tun Openg dalam bulan April 2017.

“Aku deka madah ngagai semua ke alai projek kompleks tu udah ditinda, lalu tinda diberi ngagai pemaju. Kita ulih meda kereja berengkah digaga enda lama agi, lalu dipelaba deka tembu dalam dua taun.

“Nyadi ungkup palan aum besai (ti deka digaga besepiak enggau kompleks opis perintah), mega deka ditinda enda lama agi lalu aku pechaya tu ulih tembu dalam dua taun mega,” ku iya lebuh bejaku ba pengerami makai lemai ngenang jasa bala ketuai komuniti enggau ketuai genturung pendiau ba Balai Komuniti Serian kena malam Hari Enam.

Nitih ku berita sebedau tu, kededua projek deka beungkus urung RM200 juta. Tu udah diripot sebedau tu kompleks perintah nengeri deka begulaika langkar ikonik Baruk (rumah asal Bidayuh), langkar ngayanka raban etnik Bidayuh menua tu ti nyadi bansa majoriti di Serian.

Ba lansa bukai, palan aum besai Serian deka nyadi palan keterubah ti baka nya ba bagi menua Serian lalu nyilih Palan Sivik tauka konsep Balai Suarah.

Manyin mega madah ba jaku dipansutka iya, kededua projek beguna amat ngagai Bagi Menua Serian ti udah ngerembai taja nyadi bagi menua pemadu ‘ biak’ ba nengeri tu.

Pengawa ngangkatka Serian nyadi bagi menua ke-12 ba nengeri tu ari niang Adenan dalam bulan April 2014 mega meda Tebedu diangkat nyadi pelilih menua seraya Siburan nyadi pelilih mit disengkaum dalam Serian.

“Ba pekara penyampau tubuh peranak, Serian mayuh agi ari Kapit, Limbang, Mukah, Betong, Sarikei enggau nyangka Sri Aman. Ba penyampau sekula, kitai kedua pemadu mayuh pengudah Sibu,” ku iya.

Taja pia, Kaban Kunsil Nengeri (ADUN) Tebedu nya madahka diri asa laban sekeda projek perintah besai enda dipejalaika perintah besai ke baru ti ditumbuhka Pakatan Harapan (PH).

Iya madahka projek tu nyengkaum poliklinik baru di Serian ti udah dikemendarka perintah besai Barisan Nasional (BN) sebedau tu, enggau ngemanahka kompleks Imigresyen, Kastam, Kuarantin enggau Pengelikun (ICQS) di Tebedu ti udah dipesetuju perintah besai BN sebedau tu digaga begulai eng- gau perintah nengeri.

“Taba poliklinik udah dikupas enggau disungkur. Tang diperati baka perintah PH beratika baru projek nya Nyangka baka nya mega enggau kompleks ICQS d Tebedu,” ku iya.

Ba lansa bukai, pengeram diatur Serakup Ketuai Komuniti enggau Ketuai Kampung Bidayuh Bagi Menua Serian ngemataka pengawa nyuaka setipikit ngenang jasa udah disua ngagai siku penghulu enggau 13 iku ketuai genturung pendiau ti badu gawa.

Bala ti datai mega diba bekelala enggau Sapit Residen Serian ke baru, Selamat Jat Yanjah, ti udah ngepunka pengawa apin lama ke udah.

Sama datai malam nya ADUN Bukit Semuja John Ilus, Sekretari Politik Kepala Menteri Dr Simon Sinang Bada, Direktor Opis Servis Veterinar Dr Adrian Susin Ambud, Sekretari Kaunsi Pelilih Serian Constantine Jonas, Pemesai Pelilih Serian Lim Hock Meng, Pemesai Pelilih Tebedu Raymond Achen enggau Temenggong Bidayuh Serian Henry Bujang Sadok.

Newspapers in Malay

Newspapers from Malaysia

© PressReader. All rights reserved.