Dua profesional Dayak dikangau ngemujurka program motivasyen di SK Nanga Assan

Utusan Borneo (Sarawak) - - Berita Iban - Dikarang Judan Bungap

Dato Ir Alice Jawan enggau Profesor Dr Jayum Jawan ngena chara diri empu datai nyaup meri jaku peransang pelajar ngagai nembiak sekula ba menua seduai di Sungai Assan, Sibu kena hari Enam tu tadi.

Seduai tampak dikelala enggau gelar Dayak profesional ngelama tu dikangau meri jaku peransang ba program motivasyen di SK Nanga Assan.

Alice mega Sekretari Mendam Menteri Perengka Guna Mayuh kelimpah megai pengawa Presiden Sarakup Indu Dayak Sarawak (SIDS) enggau Sekretari Besai Gerempung Dayak Sarawak (SDNU) lalu Dr Jayum siku Profesor Politik enggau Pemansang di Universiti Putra Malaysia (UPM).

Dr Jayum kala besekula di SK Nanga Assan ba taun 1965.

Program motivasyen sehari nya diatur sekula begulai enggau Gerempung Apai Indai enggau Pengajar (PIBG) SK Nanga Assan ti berambaika jaku ‘Kecemerlangan Pelajar dan Ibubapa’.

Ba program sehari nya, Dr Jayum ba jaku iya madahka sekula nya udah mayuh berubah kenyau 53 taun ke udah.

Ku iya, tu ukai semina beru- bah ba penyampau nembiak sekula tang mega nambah ari penyampau kelas enggau rampa sekula nya ke diatu.

Iya madah, tikas peresa Ujian Penilaian Sekolah Rendah (UPSR) sekula nya mega bela nyulut.

Awak nya dikena iya madahka reti pemesai guna pela- jar ba chara ngubah pengidup seranta lebih agi di menua pesisir.

Alice ba gintir iya madahka diri berasai andal nembiak sekula nya deka bulih pemujur ke manah agi nangkan ke tu ila.

“SK Nanga Assan bisi awak nempa pemujur dudi hari. Nitihka juluk ati kita (nembiak), tebal agi milih pengawa nyadi lutor, injinia, ‘pilot enggau pemesai opis perintah,” pia ku iya madah.

Berindik ari nya, Alice nyakap bala mayuh SK Nanga Assan nyengkaum apai inda ngambika bulih pemujur ba pelajar sekula kelimpah bela besemaya deka meri insentif ngagai nembiak sekula t mujur lalu ngujungka sekula deka bulih 100 peratus pas ba UPSR taun tu.

Kepala Pengajar sekula Conillia Apin madah, program sehari nya mujur digulu 100 iku nembiak enggau bala apa indai sida.

Iya mega madahka diri anda abis nadai siku nembiak Taun Enam dia deka bulih semua ‘A ba UPSR taun tu kelimpah nembiak bukai bulih 100 peratus pas ba semua subjek.

Sama bela datai maya tu iya nya pengari Pemesai Opis Pelajar Pelilih Sibu William Anut enggau PIBG SK Nanga Assan, Mohamad Firdaus Abdullah.

ANDAL: Bala nembiak, apai indai enggau pengajar begambar begulai enggau Alice enggau Dr Jayum ti ngemujurka program.

NYAUP NEMBIAK: Dr Jayum mantaika jaku peransang iya ngagai apai indai, pengajar sereta nembiak SK Nanga Assan.

DIPEBASA: Alice enggau Dr Jayum disempulang Conillia duduk ba rintai mua sebedau program belabuh.

KENANG KITAI: Alice (tengah) nerima tepa ari apai indai nembiak seraya dikemataka Firdaus (kanan).

Newspapers in Malay

Newspapers from Malaysia

© PressReader. All rights reserved.