Sistem MHP meri bekal kuasa karan 24 jam ngagai peranak Long Liam
Peranak Long Liam, menua ulu Baram berengkah ngasaika bekal kuasa karan 24 jam nengah sistem kuasa hidro mikro (MHP) ti beungkus RM300,000.
Projek nya asil pengawa beripai peranak menua lalu dikemansangka Civil Society Organsations (CSO), Save Rivers, Tonibung, Bruno Manser Fund enggau Green Empowerment and Seacology.
Menijar Projek Tonibung, Dominic M Usek madahka projek MHP nya udah digaga nengah pengawa beripai tembu dalam timpuh setaun ti berengkah ari bulan Januari 2018.
“Projek tu udah tembu kena 12 Januari tu tadi ti ulih meri bekal kuasa karan 24 jam ngagai peranak Long Liam,” ku iya.
Dominic madahka sida deka seruran matih enggau bekunsika penau ngagai peranak dia ba pengawa ngintu pemansut kuasa nya.
“Pengudah tu kitai deka seruran matau projek tu ari semengat gawa beripai peranak ba pengawa ngintu iya.
“Aku pechaya pengawa tu nyadika sistem MHP diintu manah lalu ulih tan lama, meri pemaik timpuh panjai ngagai peranak rumah panjai,” ku iya.
Ngarika peranak menua nya, Boyce Anyie meri tabi puji ngagai inisiatif gempung ukai dikuasa perintah (NGO) ti milih Long Liam nyadi taba bejalaika hidro mikro.
“Pengidup kami besehari sehari majak muntang ari pemis bekal kuasa karan 24 jam lalu sistem pemansut kuasa karan ti manahka rampa menua,” ku iya.
Anyie ti mega ketuai komit MHP Long Liam madahka projek nya meri pemaik ngaga urung 42 pintu bilik rumah panjai.
Ba lansa bukai, Chairman Save Rivers, Peter Kallang madahka raban sida deka ngatur aum besai Clean Energy Collaboration kena 15 enggau 16 March tu ila di Kuching.
Aum besai tu deka diatur ba Hotel Pullman Kuching t deka ngempuruka bala ejens ari dalam enggau luar menua ti ngaul diri dalam industr pemansut kuasa karan.