Anjung anak ti nadai dokumen pengelala besekula: Fatimah
Bala apai indai ke bisi anak ti nadai dokumen pengelala dilalau anang sanggu nganjung anak sida besekula.
Tu beduduk ari polisi baru Perintah Besai nengah Opis Menteri Pelajar ti ngemendarka bala nembiak ke nadai dokumen ulih diterima besekula berengkah taun tu asal sida nya ada ba Malaysia, ku Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Sri Fatimah Abdullah.
“Kitai bela nemu berengkah taun 2019 semua anak mit ke nadai dokumen pengelala patut diterima besekula.
“Nyadi, penatai kami ngagai Palan Pelajar D’ Wira tu sehari tu laban aku nemu di Kuching semina tu aja palan pelajar ti bisi nyendiaka servis pelajar ungkup nembiak ti nadai dokumen pengelala tauka sida ti kena tinggal besekula.
“Kategori nembiak ke nadai kala besekula tu bisi tiga iya nya kesatu penanggul ruang bilik ( penanggul belanja), kedua nadai dokumen pengelala baka surat pengada enggau ketiga status peranak menua (ukai peranak menua enggau benung minta nyadi peranak menua),” ku iya.
Fatimah madah munyi nya ngagai pemberita pengudah ngabas Palan Pelajar D’Wira ba Jalai Sky Garden, Swee joo Park ditu, kemari.
Nya alai, aku ngarapka bala apai indai nemu pemesai guna nyengula anak sida lalu anang ngelak bala anak sida bekedayau ngapa ba sebelah mengeri.
“Ari ti ngelak bala anak bekedayau ngapa, manah agi sida tu dianjung besekula ngambi tau bulih batang pengawa ke menyana jemah, ku iya.
Fatimah mega ngelalau bala apai indai meseti ngereja tanggungpengawa diri ngerejista pengada anak bepelasarka Ordinan Pengada enggau Pemati awakka anak enda mar deka ngaga dokumen pengelala (tingki) jemah.
“Pia mega sida ti deka nir rumah tangga patut nikah nitihka atur undang-undang awakka nadai nyadi penanggu ngagai anak ti deka ada.
“Ulah kawin ti enda nitih atur ngujungka mayuh anak nyau beapaika nama inda diri empu. Tu mih penanggul ti dikeengai kitai pengawa tu nyadi ketega anak nya ada sebedau nikah tauka siku ari apai tauka indai ukai status peranak menua,” ku iya.
Berebak enggau nya, Fatimah diberi basa nyuaka dokumen surat pengada ngaga siku nembiak asil bantu Palan Pelajar D Wira.
Sama bisi datai Sekretar Mendam KKWKM Dr Saadiah Abdul Samat, Pemesai Unit Pemansang Anak Mit KKWKM Dr Intan Pemesai Opis Pelajar Pelilih (PPD) Kuching, Pemesai Opis Pengerejista Bansa (JPN) enggau bala apai indai nembiak Palan Pelajar D’Wira.