Palan Pelajar D’Wira nyendiaka servis pelajar ungkup bala nembiak ti bepenanggul masuk sekula primari
Palan Pelajar D’Wira ba Jalai Sky Garden, Swee Joo Park bisi nyendiaka servis pelajar ungkup bala nembiak ti bepenanggul masuk ngagai sekula primari perintah tauka peribit.
Menijar palan pelajar tu, Jap Siew Moi madah palan tu beoperasyen kenyau 10 taun ke udah (taun 2009) ba Batu Kawah sebedau ke mindah ngagai palan baru di Jalai Sky Garden, Swee Joo Park.
“Kami nerima sesapa aja nembiak ke beumur 3 nyentuk 19 taun enda kala besekula dikena mantu sida awakka nemu macha enggau nulis.
“Ditu mega kami enda ngeletak bayar ke besai iya nya semina RM20 sebulan. Penyampau bayar tu diasai ulih ditangkup raban apai indai ke kurang penatai pemisi,” ku iya.
Iya madah munyi nya lebuh dikerandau pengarang berita pengudah nerima penemuai Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Sri Fatimah Abdullah ba Palan Pelajar D’Wira ditu, kemari.
Ku Jap, palan pelajar tu beoperasyen pagi enggau lemai lalu dikemujur tujuh iku pengajar ke udah chukup latih.
Kelimpah mantu bala nembiak belajar, palan tu mega naka ulih mantu bala nembiak minta dokumen pengelala ke sah nengah kerejasama enggau Opis Pengerejista Bansa (JPN).
“Ungkup anak mit ke udah mujur bulih dokumen pengelala dia kami nyaup sida ngerejista diri ngagai sekula perintah nengah kerejasama enggau Opis Pelajar Nengeri (JPN) Sarawak.
Ungkup sesi sekula taun tu, Palan Pelajar D’Wira mujur nerima 110 iku nembiak ti udah ngerejista diri. Penyampau tu disadang nambah laban palan ke baru tu berengkah dibuka kemari.
Penerang silik pasal Palan Pelajar D’Wira tau ditanya terus nuju lumur telefon binching Jap iya nya 0168852562.