Semua raban bisi hak ngasaika asil pemansang ke sebela: Dr Annuar
Menteri Muda Pelajar enggau Pansik Teknologi Dr Annuar Rapaee deka nentuka kesemua raban nadai ngira pengarap dipegai sida ngembuan palan ti meruan endur sida besembiang.
“Nya kebuah aku nadai asai sanggu bejalai ngelawa kuil enggau gerija. Aku kia laban bejalaika servis diri lalu nadai pekara pasal ngerembaika pengarap bukai tauka nguingka runding sida.
“Nyadi pengari rayat, aku patut enda bechiping ngagai semua pengarap enggau bansa. Semua bisi hak ngasaika asil pemansang,” ku iya madah ngagai The Borneo Post lebuh dirandau ensanus, senentang penerang dibantaika iya ba Facebook ba pejalai ngabas Gerija Methodist Iban di Kemuyang semak ditu, kena Hari Minggu.
Palan Servis Nangka iya mega bisi nyuaka pemeri seunit LCD projector enggau laptop ngagai gerija nya.
Lebuhka dia, iya madahka pastor Joseph udah minta iya bejaku.
Dr Annuar, ti mega Menteri Muda Pengawa Berumah enggau Pengerai Mensia Mayuh, nyemetak madahka pekara pemadu beguna ngagai Sarawak nyadi menua di Malaysia ngetanka pengelantang jalai pengarap sida.
“Kitai mesti ngetanka pengelantang ba pengarap diri lalu patut anang ngelakka orang bukai ngerusak pengelantang tu.
“Nya kebuah kitai patut ngetanka penyerakup sereta mega nentuka kuing pejalai kitai empu dudi hari,” ku Kaban Kunsil Nengeri (ADUN) Nangka nandu.
Pejalai ngabas Gerija Methodist Iban semina siti ari mayuh chunto ti ngayanka Dr Annuar gawa nunda jaku – nyadika teladan ngenegapka pengelantang jalai pengarap ngagai rayat ti bebida pengarap.
Baru Hari Enam tu tadi, iya bejalai ngabas Kuil Sri Maha Mariamman Sibu ditu nyuaka agih belanja penyampau RM100,000 ari Unit Pekara Pengarap Bukai (UNIFOR) ngagai presiden kuil, Detective Sergeant K Manogaran dikena nyaup ngaga kuil baru sida.
Dr Annuar mega udah ngagihka RM300,000 ari belanja Program Transformasyen Menua Pesisir (RTP) enggau RM100,000 agi ari belanja Projek Mit Pemansang Menua Pesisir (MRP) dikena nyaup ngaga Kuil Sri Maha Mariamman Sibu ke baru nyadi nyata.
Kelimpah ari nya, iya mega ngatur gempuru Interfaith Raya enggau ngangkatka gempuru nya pengawa ninting taun dikena ngempuruka rayat bebida pengarap di Sibu begulai ngintu hari besai.
Siti agi anak runding iya ngenegapka pengelantang jalai pengarap enggau pekara bansa iya nya ngempung beribu rayat ari semua serak idup ngambi bagi dalam serumpu makai gaya belepa maya muka puasa.