GPS deka bebendar ngemansang, ngintu nengeri Sarawak
Kitai mengkang tinggal ari sukut infrastruktur, pemansang perengkaguna lebuh dipegai Malaya nengah parti politik BN
KAPIT: Kaban Kunsil Nengeri Layar, Gerald Rentap Jabu madahka ‘GPS Flag Rally 2019’ betuju nerangka ngagai semua peranak di serata Sarawak sentang gempung parti politik nengeri tu, GPS ti udah ditumbuh pengudah Pengawa Bepilih Besai kena 9 Mei 2018, ngambika ulih ngemansang sereta ngintu Sarawak ari baruh Sempekat Malaysian 1963 (MA63).
Ketuai Nembiak PBB ti mega nguluka ‘ GPS Flag Rally 2019’ madah, lebih 50 taun ke udah, maya nya Sarawak, Sabah enggau Malaya numbuhka Malaysia ti nyadi bakih ke sebaka. Kitai dipegai Malaya bepelasarka parti politik (BN). Nama penyadi? Ngelama tu kitai tinggal dibelakang. Kitai mengkang tinggal ari sukut infrastruktur enggau pemansang perengkaguna lalu pemansut menua kitai baka minyak enggau gis, diambi sida.
“Lebih 50 taun kitai dipegai parti politik ari Malaya. Pengudah Pengawa Bepilih Besai 2018, PH (Pakatan Harapan) numbuhka Perintah Besai. Nya alai kitai enda tau enda berundingka nengeri kitai, lalu utai ti pemadu manah ke Sarawak. Kitai enda tau enda berundingka ‘Sarawak Dulu’, kitai berundingka pengidup jemah ila. Nya kebuah kitai numbuhka GPS ngambika ulih ngintu Sarawak Dulu,” ku Rentap.
“
Lebih 50 taun kitai dipegai parti politik ari Malaya.Pengudah Pengawa Bepilih Besai 2018, PH (Pakatan Harapan) numbuhka Perintah Besai. Nya alai kitai enda tau enda berundingka nengeri kitai, lalu utai ti pemadu manah ke Sarawak. Kitai enda tau enda berundingka ‘Sarawak Dulu’, kitai berundingka pengidup jemah ila. Nya kebuah kitai numbuhka GPS
” ngambika ulih ngintu Sarawak Dulu.
Gerald Rentap Jabu Kaban Kunsil Nengeri Layar
“Gempung GPS diarika empat buah parti baka PBB, PRS, SUPP enggau PDP. Semina parti ari Sarawak nemu utai ke diguna enggau juluk ati rayat, lalu baka ni deka kitai deka ngemansangka nengeri tu. Ba pekara tu, aku bebasaka niang Tok Nan (ex Kepala Menteri Sarawak) ti meri peransang ngagai kitai ngambi pulai hak ari baruh MA63 ti majak nadai agi diambi perintah besai. Malam tu kitai nempa sejarah laban gempung politik baru GPS udah ditumbuh ngambuka ngintu nengeri Sarawak,” ku Rentap lebuh bejaku ba Rumah Edison Bugap, di Jalai Melekun, Baleh ditu lemai ensanus beserimbai enggau ‘GPS Flag Rally 2019’ Bagi Menua Kapit.
Rentap ngelalau mensia ke alai Kapit kala nyadi kuat Perintah GPS Sarawak. Kitai milih pengari rayat ari GPS, lalu kitai bebendar gawa mai pemansang dikena ngangkat- ka kualiti pengidup rayat.
“Kapit ba bagi tengah nengeri Sarawak. Perintah nengeri beratka pemansang infrastruktur ngambika sebaka pemansang enggau bagi menua bukai. Kepala Menteri Abang Johari udah numbuhka Ejensi Pemansang Ulu Rajang (URDA) dikena ngangkatka pemansang infrastruktur enggau perengkaguna. Ari taun 2019 nyentuk 2020, RM1.5 bilion udah diungkup ke pemansang infrastruktur. Kami pechaya, enti semua projek tu udah tembu ila, Kapit bisi gamal baru. Kami ( GPS) komited ngereja apengawa ke patut digaga kami. Diatu, ke beguna amat, rayat Sarawak enda tau enda beserakup ngintu hak enggau pengelebih kitai,” ku Rentap.
Ku niang ‘Tok Nan’, kitai enda tau enda ngambi pulai hak kitai. Perintah nengeri ti betuaika Abang Johari ngemajakka pengawa dikereja ‘Tok Nan’ ke deka ngambu pulai hak kitai.
Autonomi ba pekara imigresyen nya beguna amat. Sarawak bisi tiga juta rayat. Malaya bisi urung 30 juta. Nama penyadi enti kitai nadai agi hak ba imigresyen? Orang Malaya sepeneka ati tama kitu. Sida udah lama maju, lalu nama penyadi kitai dih? Kitai deka merinsa.
Hak kitai ba asil pengeraja menua baka minya enggau gis. Enti nengeri bisi asil kediri empu, kitai enda bepanggai ba Malaya meri kitai belanja dikena ngemansangka nengeri tu. Baka nya mega pengelikun ba garis entara menua, ngambika nengeri kitai enda dipasuk orang ari luar sengapa. Kitai meseti nentuka pengelikun di nengeri tu ngambika rayat ulih idup likun sereta lantang.
Nya alai pengari rayat enggau nembiak redak, ngembuan tanggungpengawa ke sama ngintu hak sereta ngemansangka Sarawak,” ku Rentap.
Sama bisi bejaku ba pengerami nya Tuai Rumah Edison Bugap, koordinator GPS Flag Rally 2019, Kaban Kunsil Nengeri Serembu Miro Simuh, Menteri Muda Nembiak Lumba enggau Main Sarawak Datuk Snowdan Lawan ke mega Kaban Kunsil Nengeri Balai Ringin sereta Ketuai Nembiak PRS Kaban Kunsil Nengeri Pelagus Wilson Nyabong Ijang Kaban Kunsil Nengeri Bukit Goram Jefferson Jamit Unyat enggau MP Hulu Rajang Datuk Wilson Ugak Kumbong ngarika Sapit Kepala Menteri Tan Sri Datuk Amar Dr James Jemut Masing.
Lebih 1,000 iku penyukung GPS bisi datai ngulu pengerami nya.