Dr Annuar ransing mantaika logo GPS ngena inisiatif diri empu
Mandal Presiden Parti Pesaka Bumiputera Bersatu (PBB) Dr Annuar Rapa’ee ngena inisiatif diri empu deka niki rumah ke rumah mantai ngagai mensia mayuh lambang Gabungan Parti Sarawak (GPS) di sitak Kunsil Nengeri (DUN) Nangka.
Iya madahka pengawa iya tu deka disaup tiga iti parti komponen dalam GPS iya nya Parti Rayat Sarawak (PRS), Parti Sa’ati Sarawak (SUPP) enggau Parti Demokratik Progresif (PDP).
“Ba Nangka, aku udah minta saup SUPP Nangka, PDP Nangka enggau PRS Nanga begulai enggau kitai.
“Kitai deka niki rumah siti ngagai rumah siti ba DUN Nangka madah ngagai mensia mayuh lambang ti patut disukung laban lambang nya ngelai kitai anak nengeri Sarawak,” pia ku iya madah.
Iya mantaika jaku tu maya Pengerami Nyuaka Menira GPS di Dewan Kelab Melayu Kampung Nyabor (MUC), malam hari Minggu, beserimbai enggau Bejalai Ngemai Tambai GPS di serata Sarawak.
Dr Annuar ti mega Kaban Kunsil Nengeri ( ADUN) Nangka madah, penumbuh GPS beguna bendar laban ti nyadi gempung parti enggi peranak Sarawak.
Berindik ari nya, ku iya, rayat serata nengeri Sarawak meseti dipandangka enggau lambang nya berengkah ari diatu taja nyangka ukai pengawa muntang.
“Enti suba kitai begulai enggau BN (Barisan Nasional) lalu kitai begulai enggau pangan diri ba gempung parti renggat menua.
“Tang diatu kitai badu dia agi. Kitai udah kediri begulai enggau anak nengeri Sarawak nentuka kuing nengeri tu.
“Nya alai, bala mayuh ke datai malam tu...aku minta kitai ukai semina bepadah ngagai bala anak uchu di rumah tang bepadah ngagai bala bukai mega,” ku iya madah baru.
Ba pengawa malam nya, urung 1,000 iku raban GPS ari PRS, PBB, SUPP enggau PDP nerima penatai konvoi Bejalai Ngemai Tambai GPS kira pukul 8 malam.
Konvoi tu betuaika ADUN Layar Gerald Rentap Jabu ti mega Ketuai Raban Nembiak PBB.
Sama bela datai maya tu iya nya Ketuai Raban Nembiak PRS Datuk Snowdan Lawan.