Pengawa nyiri Pemesai Ngereja Pengawa Khas KKMM siti basa besai: Dusit
Pemesai Ngereja Pengawa Khas Opis Menteri Komunikasyen enggau Multimedia (KKMM) di Sarawak ti baru dichiri gawa, Dusit Jaul madahka pengawa nyirika iya nya nyadi siti basa enggau ngaku peneleba iya lebih 30 taun pengelama dalam servis perintah ba perintah besai.
Dusit, 61, pangku pengawa kepenudi nyadi Direktor Unit Pengatur enggau Pelin Pengawa Malaysia (MAMPU) ba Opis Menteri Besai ungkup Nengeri Sarawak, ngembuan juluk ngaga ubah ti menyana agi ari sukut kaul nengeri enggau perintah besai.
Pengawa nyirika iya berengkah diterit kemari dibantaika Menteri Komunikasyen enggau Multimedia Gobind Singh Deo ti bisi di nengeri tu ba pejalai gawa enggau Dusit menggi tanggungpengawa ngeripot terus ngagai menteri nya.
“Terima kasih ngagai menteri udah ngelempaika pengandal ngagai aku ng- atur pekara opis menteri di Sarawak, beri aku timpuh enam bulan bejalaika iya.
“Ba penemu aku, interaksyen terus (antara bala pemesai perintah enggau ketuai politik renggat nengeri enggau perintah besai) beguna amat ngambika kitai bela meretika peminta pangan diri,” ku iya madah ngagai Bernama, ditu kemari.
Antara pangku pengawa iya baka matau kesemua ejensi di baruh KKMM di Sarawak iya nya Opis Pemadah, Radio enggau Televisyen Malaysia (RTM), Gerempung Berita Nasional Malaysia (Bernama), Gerempung Pemansang Filem Nasional, Komiti Komunikasyen Enggau Multimedia Malaysia, Pos Malaysia enggau Telekom Malaysia, ku Dusit ti deka ngatur randau enggau kesemua sida enda lama agi.
Senentang chara ngemanahka kaul antara perintah besai dipegai Pakatan Harapan (PH) enggau perintah nengeri, ku iya, bida pelasar politik enda patut nekul kerejasama sida.
“Kitai patut berandau, ba penemu aku, nadai nanggul tambah mega kitai gawaka rayat, nya kebuah sekalika ar perintah besai tauka nengeri kitai menggi tanggungpengawa ngenegapka rayat ngena sebarang chara ti ulih,” ku Dusit ti asal penatai ari sebuah genturung pendiau Iban d Jalai Gedong, Serian.
Dusit ti mega Presiden Serakup Graduet Dayak Sarawak (SDGA) nyadi peranak Sarawak kedua dichir mangku pengawa besai ar perintah besai ke diatu, pengudah nyiri perunding pengatur pengawa Dr John Brian Anthony nyadi Chairman Kaunsil Penyangkai Kapa Bintulu taun nyin tadi.
Ba lansa bukai, John Brian t mega ari komuniti Iban, nerima manah pengawa nyirika Dusit lalu ngumbai pengawa tu belalauka penau nyad ketuai enggau peneleba besa Dusit dalam servis perintah ba perintah besai. — Bernama