Endur nginsap patut ditumbuh nyeliahka papung insap dibuai sengapa

Serakup Pengempu Pak Kupi enggau Restauran Kuching (KCSROA) dekaka zon nginsap ditumbuh maya tagang nginsap ba semua kedai makai berengkah diterit ba Sarawak kena 24 Januari tu.

Chairman sida, Teo Giat Liew madahka endur nginsap patut ditumbuh enti raban bekuasa enggai meda papung insap dibuai sengapa.

“Nadai dipadah sekalika sida ti nginsap deka muai papung insap enggau betul maya sida dikemendar nginsap ba takah dikemendar ari kedai makai.

“Kitai nyangka meda papung insap ba sebarang endur kelimpah raban bekuasa enggau pengempu kedai makai ulih nyendiaka mayuh tung urus ba mayuh endur,” ku iya lebuh dirandau kemari.

Ku iya nambah, pengawa matau deka muntang agi dipejalai enti raban bekuasa nyendiaka endur nginsap.

Pia mega ku iya, pengudah tagang tu diterit ila, operator pak kupi enggau restauran enda bejalaika pangku pengawa nyadi pemesai penerit adat.

Berebak enggau nya ku iya, operator pak kupi enggau restauran ditu sedia bejalaika atur tagang nginsap ba semua kedai makai ti udah berengkah diterit ba Semenanjung Malaysia 1 Januari tu tadi.

“Aku beratika beberapa kedai makai ba mengeri tu (Kuching) udah ngelekatka pak ‘ Dilarang Merokok’ baka ti dipinta di baruh atur baru tu.

“Perintah besai dekaka iya diterit ari 21 Januari lalu enam bulan timpuh nangkan sida ti nginsap. Kabinet nengeri mutuska 24 Januari tu tagang nya berengkah diterit lalu kami udah sedia,” ku iya.