Nembiak SK Maludam, SJK Chung Hua di Betong bela nerima pemeri beg sekula ari Simoi
Sepenyampau 450 iku nembiak ari Sekula Primari (SK) Maludam, Betong nerima pemeri beg sekula ari Kaban Kunsil Nengeri (ADUN) Lingga, Simoi Peri.
Ku iya, pengawa nyuaka bantu kantung sekula ngagai sekula ba sitak DUN Lingga tu iya nya program ninting taun Palan Servis Komuniti DUN Lingga.
Ku Simoi, nengah pemeri tu, 450 iku nembiak SK Maludam udah nerima seraya 137 ke bukai ari Sekula Primari Bansa China ( SJK) Chung Hua, Maludam.
Iya mansutka jaku tu lebuh bejaku ba Pengawa Nyuaka Kantung Sekula Ngagai Sekula Primari DUN Lingga bepalan ba Balai Sri Budiman, SK Maludam pagi kemari.
“Aku ngarap nengah bantu baka tu ulih ngelempungka tating belanja bala nembiak kitai ti baru ngepunka sekula sida ba pun taun tu,” ku iya.
Sama datai Sapit Ketuai Pampang Parti Pesaka Bumiputera Bersatu ( PBB) Lingga, Mohd Yusuf Lugom, Kepala Pengajar sekula, bala pengajar sereta apai indai nembiak.
Berebak enggau nya, Simoi mega bisi nyuaka geran ninting taun perintah ngagai Serakup Apai Indai enggau Pengaja (PIBG) kededua sekula nya.