Tiga blok rumah pekereja Kem Batang Simpang Bakun angus lengis

Sepenyampau 130 pekereja ti diau ba tiga blok rumah pekereja ba sebuah kem batang di Simpang Bakun ditu semina tinggal gari ba punggung pengudah rumah nya angus lengis ba penusah ti nyadi urung pukul 2.55 lemai Hari Satu tu tadi.

Ketuai Opis Bomba enggau Penyah Penusah Bintulu, Mohamad Meramit ngenuku raban sida betubuh lapan iku berumban ngesah ngagai endur penusah nyadi ngena sebuah FRT enggau EMRS, pengudah nerima kangau ngenyit pasal penusah nya.

“Raban kitai nyauka dua jam setengah napatka endur penusah nyadi urung 160 kilometer ari Pasar Bintulu lalu datai din urung pukul 5.30 lemai,” ku iya nerang.

Ku iya, lebuh sida datai dia meda kesemua begunan nya udah angus lengis.

Raban Opis Bomba enggau Penyah Penusah Bintulu enggau bantu raban Bomba Volunteer Uma Daro, ku iya bejalaika pengawa matau ke alai api mujur dirara urung pukul 8.45 malam.

“Pansik silik deka dipejala ngambika nemu berapa penyampau pengerugi enggau pun ke amat penusah tau nyadi,” ku iya.

Kesemu sida ti tasah diau ngenduh ba dua buah blok rumah pekereja bukai besemak ti enda angus, seraya ngant bantu udah tu datai.