Perintah besai patut mutarka isu ungkus mai petrol ke Kapit, Song
Chairman Parti Tindakan Demokratik ( DAP) Pampang Katibas Paren Nyawi ngansak perintah besai ngambika masuk champur dalam isu ti bekaul enggau ungkus mai minyak petrol ke Song enggau Kapit.
Ku Paren madah, nya berindik ari rega minyak di sebuah stesyen minyak ti nadai chap ba pasar Song sereta sebuah agi di Kapit ngeletakka rega ti tinggi enti dibandingka enggau rega minyak petrol ba stesyen minyak ke bisi dipegai kompeni ke besai.
Ku iya, rega petrol ti dijual stesyen minyak nya embar agi laban pedagang ti ngempu ste- syen nya mayar lebih ungkus mai minyak nya kediri.
“Berindik ari nya, aku ngarap perintah besai deka berunding meri subsidi ba ungkus mai petrol ke Song sereta Kapit ngambika rega nyual minyak di stesyen minyak nya ulih disebela enggau stesyen minyak bukai ti diempu kom- peni minyak besai di selampur Malaysia.
“Kaul perintah besai dalam isu tu deka ngayanka sida endang bebendar dalam ngintu nasit peranak menua pesisir Sarawak kelebih agi Kapit ti endang pelilih ke bedau entu datai jalai darat,” ku iya madah lebuh ti dikerandau kemari.
Bejaku bekaul penemuai Sapit Menteri Dagang Dalam Menua enggau Pekara Penguna Chong Cheng Jen ke Kapt kena Hari Lima tu tadi, Paren ngarapka sekeda penanggul bukai ulih diputar.
Tu nyengkaum deka berundingka nambah dua agi stesyen minyak di kandang menua nya sebedau pengerami HAri Gawai taun tu.
Ku iya, nya perambu dikena mutarka penanggul timpuh panjai dikena napi penanggul kurang minyak diesel enggau petrol ti seruran nyadi nyentukka ngerampit pengawa besehari hari rayat di sitak nya.