Kebun Kampung Sarawak beguna ba pemansang industri bekaul kayu jemah ila

Industri kebun kampung Sarawak nagit tanah pemesai 1 juta hektar dikena nentuka bekal kayu ulih nangkup pinta industri kayu di nengeri tu jemah ila.

Menijar Besai Kaunsil Pemansang Kayu Ramu Sarawak (PUSAKA) Hashim Bojet madah kebun kampung bisi potensial ngemansut kayu lumpung ba tikas 4 juta meter setaun dalam timpuh 5 taun ti deka datai.

“Kebun kampung chukup beguna ba pemansang industri ke bekait enggau kayu jemah ila.

‘Ketegal nya, kitai meransang industri nyikap manah teknologi gudang seraris enggau ubah ke nyadi ba bansa enggau fizikal kayu lumpung ke dipasut ari kebun kampung,’ku iya.

Iya mansutka pekara nya ba jaku pengelalu rambau program Gempuru Ninting Bulan 2019 PUSAKA ke diatur di Wisma Sumber Alam, Petra Jaya ditu kemari.

Gempuru ngundang temuai dipebasa Sapit Kepala Menteri Datuk Amar Awang Tengah Ali Hassan.

Seraris enggau ubah ba industri kayu nengeri, Hashim madah PUSAKA diatu benung chakah ngelaku industri baru dikena meransang ngeluar produk baru ari kayu lumpung ke diambi ari kebun kampung.

Entara sekeda produk baru ke disebut Hashim iya nya ‘engineered wood product’, biomass, biofuel, pulpa enggau keretas sereta jemari.

Ngenang kaul ke sama, iya madah ekspot produk kayu Sarawak ari bulan Januari nyentuk Disember 2018 ba penyampau RM5.44 bilion.

“Penyampau tu kurang 11 peratus enti dibandingka ba taun 2017 iya nya ba penyampau RM6.13 bilion.

“Produk ke diekspot ba taun 2018 iya nya produk ari industri prima ba ikas 91 peratus baka ke papan lapis( RM3.19 bilion), balak(RM773 juta), kayu udah disayat(RM673 juta) enggau mdf (RM332 juta).

“Penyampau ekspot produk berega jemari mengkang baruh iya nya semina 2 peratus aja,”ku Hashim.

Bepelasarka ekspot JanDis 2018 ku iya, produk ari industri kayu Sarawak dijual ke menua Jepun (RM2.69 biliun), India (RM545 juta), Korea (RM424 juta), Menua Timur Tengah (RM385 juta), Taiwan (RM358 juta) enggau Menua ASEAN (RM666 juta).