MAVCOM bebendar nentuka industri penerebai bilun majak ngerembai
Komiti Penerebai Bilun Malaysia (MAVCOM) bebendar deka nentuka industri penerebai bilun di Sarawak ulih nangkup peminta ekonomi menua.
Ketuai Operasyen MAVCOM, Azmir Zain madah, ngambika nengeri ti terus ngerembaika pengulih besemekih enggau menua bukai, dia tikas pengulih nya meseti dikelala kelimpah diberi sukung.
“Beduduk ari pejalai penyambung nengah langit ti jampat agi, nyadi nya deka lengkas agi nyungkak pengerembai ekonomi menua.
“MAVCOM sigi bebendar nentuka industri penerebai bilun terus ngerembai nyaup ngemudahka agi pemansang pengawa dagang enggau dagang temuai di Sarawak,” ku iya.
Iya madah munyi nya rambau sesi penerang ngagai media bekaul enggau sevis penerebai bilun menua pesisir ke diatur ba sebuah hotel tebilang ditu, kemari.
Ku iya, Program Servis Penerebai Bilun Menua Pesisir (RAS) beguna amat dikena nyungkak pemansang ekonomi Sarawak laban nengah program tu iya deka nyendiaka bemacham servis ngagai komuniti ukai semina ungkup pejalai diri, tang mega mantu ari sukut ngemansangka pekara pelajar nembiak nyadi manah agi.
“Kami ( komiti) berasai gaga ati meda program RAS tu ngerembai enggau mujur. Opis Menteri Perengka Pengangkut apin lama ke udah udah nyain sempekat enggau MASwings ngemujurka 40 pejalai RAS di Sabah enggau Sarawak (ungkup timpuh 2019-2024) nengah Sempekat Obligasyen Servis Mensia Mayuh (PSO) ke baru.
Bepelasarka penerang Menteri Perengka Pengangkut, Anthony Loke Siew Fook, enam pejalai RAS (Kota Kinabalu-Sandakan, Kota Kinabalu-Tawau, Kota Kinabalu- Miri, KuchingMiri, Kuching-Bintulu enggau Kuching- Sibu) udah diatur baru nyadi pejalai komersial penuh berengkah 1 Januari 2019.
“Pejalai tu enda agi nitihka sempekat PSO lalu enda ulih dikategori dalam RAS laban sida benung beoperasyen begulai enggau MASwings sereta kompeni penerebai komersial ke bukai,” ku iya.
Nya kebuah, MAVCOM ngasaika program RAS chukup manah lalu deka meri pemaik ngagai penumpang ba Sabah enggau Sarawak enggau sektor ke bekaul.
“Penerang dipansutka perintah apin lama ke udah ngujungka RAS diatu udah muka penerebai ke baru. Ambika chunto, Long Pasia di Sabah udah ulih lawa sebaka enggau di Bukit Mabong, Kapit kelimpah Belaga enggau Long Silat di Sarawak (taja pia ba sukut infrastruktur agi empai menyana). Tu mandangka pengeransing program RAS,” ku iya.
Nangkan tu ila, dipelabaka bisi penambah ba penerebai ke baru. Nya alai MASwings deka mantaika rintai pejalai ke baru ungkup sekeda palan ke udah dipilih.
Entara nya baka penerebai RAS ari Limbang-Kuching, Long Lellang-Bario, Long Seridan- Bario, kelimpah servis kargo khas ari Miri enggau Bario, Ba’Kelalan, Long Seridan, Long Akah enggau Long Banga ( penerebai bilun kitu seminggu sekali).
Beduduk ari pengarap ke udah diberi ngagai MAVCOM, nyadi komiti tu deka naka ulih nentuka RAS nyadi pilih bala penumpang, kelimpah nentuka pengawa nguna subsidi ari perintah dikena enggau meruan ke pemaik servis penerebai langit ba Sabah enggau Sarawak.
“Dikena nentuka pengelantang pendiau raban penumpang dikemerat, sistem matau ke dikena RAS udah dikemanah agi kelimpah beratika timbal penemu ari bala penumpang.
“Ari tinjau tauka timbal penemu ari bala penumpang digaga ba taun 2018, dia penumpang bisi madahka sukut ke patut dikemanah agi iya nya ngurangka pengawa nginsil servis enggau servis laun kelimpah ngelajuka agi pejalai sesebengkah penerebai.
“Penumpang mega deka meda mayuh agi diskaun tambang enggau promosyen ke manah kelimpah nambahka agi pemisi perengkaguna,” ku Azmir nerang enggau nyemetak.
RAS endang beguna amat laban servis penangkut langit chukup muntang agi dikena ngelawa komuniti ke diau ba menua pesisir kelimpah ngemudahka pejalai sida ari pesisir ngusung palan enggau menua bukai
Beduduk ari pemesai guna RAS ke udah nyata, nyadi komiti MAVCOM deka terus matau operasyen tu enggau manah kelimpah berandau enggau opis ke bekaul berunding ngangkatka pemanah servis ke pemaik rayat Sabah enggau Sarawak.