KGBS nyukung inisiatif ngurangka pemayuh tanggungpengawa pengajar

Gempung Gerempung Pengajar Bumiputera Sarawak (KGBS) nyukung penuh inisiatif dikena ngurangka pemayuh tanggungpengawa pengajar ba penerang ti dipansutka Menteri Pelajar Dr Maszlee Malik apin lama ke udah.

Presiden KGBS, Ahmad Malie nengah sebengkah penerang madahka KGBS meri terima kasih ngagai Menteri Pelajar Dr Maszlee Malik laban udah ngamatka semaya deka mutar isu pemayuh tanggung- pengawa pengajar tu taja ukai semua, tang abis nadai atur bisi digaga dikena meransang bala pengajar awakka rindu agi ngajar nengah lima inisiatif ke udah dibantai.

“Nengah inisiatif baru nya, KGBS ngarap bala pengajar bela meri sukung lalu terus fokus ngemujurka program ngajar enggau belajar nyadi lebih rindang sereta meransang ati bala pengajar enggau nembiak.

“Ba pengawa pemungkal diatu, KGBS ngarapka penerang bekaul enggau lima inisiatif nya enda dikelikuh ngapa nyentuk ke puntan dititih lalu pengawa ke deka ngurang tanggungpengawa pengajar nya nyau baka ke nadai insur.

“Nya alai, KGBS minta opis bekaul baka Opis Pelajar Nengeri (JPN), Opis Pelajar Pelilih (PPD) enggau bala ketuai ba renggat sekula sama meretika inisiatif tu iya nya nama utai ke dikumbai pemayuh pengawa ngelama tu ulih dikurang awak ke pengajar fokus agi ba pengawa ngajar enggau belajar.

Berebak enggau nya, KGBS ngelalau bala pengajar bekau juluk Opis Menteri Pelajar mantaika lima inisiatif nya laban deka nentuka bala pengajar ulih bejalaika tanggungpengawa sida enggau rindu ati lalu uka enggau kusut runding ketega mayuh pengawa dikereja.

“Nengah inisiatif tu, KGBS ngarapka landskap pengawa ngajar enggau belajar ke dikereja bala pengajar tau mer pemaik ngagai pemansang pelajar bala nembiak sekula d menua tu,” ku iya.