STU besetujuka chara Menteri Pelajar ngelempungka tanggungpengawa pengajar
Gempung Gerempung Pengajar Sarawak (STU) andal ati ke penerang Menteri Pelajar ti udah madahka chara ti engkeman dikena ngelempungka tating pengawa pengajar sereta nitih ku sida nyema nembiak sekula enggau pengajar rindang, pengawa ngajar enggau belajar deka mujur dipejalai.
Nitihka penerang ti udah diripot bisi lima inisiatif ke ngaul semilan bagi pekara deka berengkah dipejalai bulan tu.
“Raban pengajar andalka penerang ari Dr Maszlee Malik ti madahka berengkah ari taun tu, pengajar enda ibuh nyediaka salin dokumen baka dokumen penatai kelas sereta rikod komiti subjek.
“STU beterima kasih ngagai menteri nya ke udah ngelepaska pengajar ari tanggungpengawa ke enda patut sereta enda relevan digaga sida kelimpah ari pengawa ngajar,” ku Presiden STU Macky Joseph madah kemari.
Nitih ku ripot media, chara tu deka dikelala nengah Mandat Pelajar 2019 ti deka ngurangka tating pengawa sida ngagai 25 peratus.
Dr Maszlee madah lima inisiatif nya deka nyadi singkang ti keterubah dikena ngangkatka kualiti ngajar, ke mega singkang ti kedua iya nya deka nyediaka mayuh agi pengawa matih enggau kus ungkup pengajar dikena nentuka sida diiri enggau pengawa ngajar ti pemadu manah.
“ATU besetuju lebuh menteri nya madahka ‘pengawa ngajar iya nya pengawa ti pemadu manah sereta besai reti lalu enda patut bisi pekara bukai ti ngeruga sereta ngenusahka’,” ku Macky.
Nyadika rikod, inisiatif keterubah udah dipadahka MoE ti deka nyediaka dokumen ngatur sereta ngintu enggau pengawa dokumen nengah tiga intervensyen – Skim Jali Bup Teks (SPBT), dokumen komiti enggau Ripot Pejalai Kelas (PBD).
Inisiatif ti kedua iya nya bekaul pengawa ngatur penerang enggau sistem ‘online’ ti deka digaga nengah dua intervensyen – semua penerang ti digumpul bekaul sekula, pengajar enggau nembiak sekula patut diambi ari penerang ti udah bisi dalam sistem lalu dikena semua raban ti bekaul dalam opis menteri nya.
Inisiatif ti ketiga iya nya sekula dikemendar ngerunding kediri program ‘Literacy and Numeracy Screening’ (LINUS).
Lalu inisiatif ti keempat iya nya bekaul pengawa nyemakaka pom enggau proses ngemata.
Inisiatif ti kelima nyengkaum pengawa ngatur pekara bekaul enggau komiti renggat sekula iya nya ti ngaul intervensyen ti ulih dikena nentuka mayuh komiti ti nadai bekaul enggau pekara pelajar deka dibuai.