Komuniti China di DUN Tasik Biru enda kala dikelaung

Kaban Kunsil Nengeri (ADUN) Tasik Biru, Datuk Henry Jinep enda kala ngelaungka komuniti China ke diau dalam kandang menua ba sitak kunsil dipegai iya.

Pengudah nyadi pengari rayat dalam timpuh dua taun tu, iya udah mantu ngemanah sereta ngaga urung 50 unit rumah komuniti nya.

“Aku udah ngelawa ngagai semua genturung pendiau komuniti China begulai eng- gau kapitan sereta pemancha.

“Kami matau rumah ke udah repuk lalu ngemanah kelimpah ngaga rumah baru ngagai sida ke patut dibantu.

“Bantu tu ukai semina ungkup komuniti ke miskin tang bela ungkup mansa penusah rumah angus,’ku iya.

Henry mansutka jaku nya ngagai pemberita rambau program ngagih buah limau mandarin nyerumba pengera- mi Taun Baru China 2019 di Pasar Bau, kemari.

Iya nambah, pengawa mantu nyendia rumah ke manah ngagai orang ke begunaka bantu nerima basa ari Perintah Nengeri alai agih belanja RM1 juta diberi ngagai tetiap ADUN Gabungan Parti Sarawak (GPS).

Ngenang pengawa keterubah iya mantu ngaga siti rumah ungkup siku bansa China ke beumur 85 taun, iya madah nya udah nyadi sejarah ba servis nyadi pengari rayat.

“Rumah keterubah komuniti China ke digaga kami diempu Chin Ah Tan di Kampung Tanjung Batu besemak enggau Pasar Bau.

“Tang ngasuh kami sinu seminggu sebedau rumah nya diserah, iya dulu ninggalka dunya tu,’ku Henry.

Bela datai Pemancha China Pelilih Bau Bong Jong long.