Tuduh salah guna kuasa ngemalu peranak Long Terawan: Gerawat

Tuduh salah guna kuasa enggau ngelimpangka belanja ari seraban orang ngagai Komiti Nagang Pengawa Makai Suap Malaysia (SPRM) udah meri malu peranak Long Terawan, Mulu.

Kaban Kunsil Nengeri (ADUN) Mulu, Dato Gerawat Gala madaj, ulah sida nya baka ti enda arapka penau SPRM enggau polis mansik silik penanggul ti dibantai.

“Sida tu nguji mejal enggau ngachau asil pansik. Ulah sida ukai semina ngemalu komuniti Long Terawan aja tang mega ngemaruhka integriti enggau nama SPRM enggau polis,” ku iya madah nyemetak.

Gerawat ti mega Sapit Speaker DUN madahka, SPRM enggau polis nyadi institusyen pekara undang-un- dang enggau ngatur pengawa sereta ngatika diri enggau integriti sida patut dipebasa semua nyengkaum perintah.

Tuduh sengapa nyengkaum gempuru mantaika pengeringat ketegal ngambi ulih diri empu enda deka mutarka isu.

Seraban orang apin lama udah nganjung memorandum ngagai SPRM bedawaka bisi salah guna kuasa ngaul atur pekara tanah NCR enggau ngelimpangka belanja rayat genturung Long Terawan.

Kenu ku Gerawat, ulah sida nya minta perati mensia mayuh kelimpah deka ngemaluka Ketuai Raban Bansa ti didawa salah guna belanja genturung pendiau.

“Aku sedar pasal ripot dibantai nuju Ketuai Raban Bansa nya lalu pansik pasal ripot enggau tudah tu benung dipejalai raban polis enggau SPRM,” ku iya nerang.

Kelimpah ari nya, Gerawat nanya sentang pengawa numbuhka Komiti Gawa Long Terawan.

Komiti tu nadai diberi mandat nyadi pengari tauka sada ngarika peranak sitak nya.

“Ba penemu aku, komiti tu enda dikearap lalu nyaru nyadi pengari rayat komuniti Long Terawan. Aku bisi penangi sekalika komiti bisi sukung majoriti komuniti Long Terawan,” ku iya.

Berindik ari nya, iya ngansak peranak Long Terawan jenuh dulu lalu ngelempaika pekara nya ngagai Opis Pelilih Marudi enggau Opis Residen Miri mutarka isu Ketuai Raban Bansa pengudah raban bekuasa nembuka pansik.

Iya pechayaka raban bekuasa deka bejalaika pansik silik pasa ripot enggau tuduh ti digaga.

“Raban bekuasa enda ulih bejalaika atur belalauka tuduh nadai penerang ti tegap. Kita patut arapka penau raban bekaul gawa mutar isu tu Enda ibuh ngatur gempuru mantaika pengeringat ba mua mayuh,” ku iya.