Kerejasama Perintah Besai-Nengeri ditanggam rat

Perintah Besai deka seruran bekerejasama enggau Perintah Nengeri ngemansangka rayat Sarawak.

Menteri Kereja Raya Baru Bian madah agi tubah pengawa patut dipejalai ba nengeri tu.

“Taun tu, Taun Jani, tentu ngemai mayuh pemar laban perintah baru seruran nyeruri pengawa ngemanahka agi atur pengawa menua.

“Beberapa pekara manah penempa ulah jani, iya nya rurus, ulih dipechaya, bendar ati, berani, pintar enggau kemerah.

“Aram kitai bela gawa ngayanka penempa ulah tu ari kerejasama nempa menua enggau penyerakup rayat,” ku iya.

Iya mansutka jaku nya ba jaku pesan Taun Baru Cina 2019.

Baru ti mega Chairman Parti Keadilan Rakyat (PKR) Sarawak madahka semua raban mesti pintar enggau bebendar gawa nempa Sarawak enggau Malaysia kering agi, meruan enggau lantang.

“Ba Sarawak kitai beratika pekara nyelai amat, Perintah Nengeri nyadi penyakal ba renggat perintah besai.

“Taja pia, Perintah Besai deka seruran bekerejasama enggau Perintah Nengeri Sarawak ungkup pemansang rayat laban mayuh kereja patut diputar.

“Berebak enggau nya, kitai mesti nampung pesan berubah nuju menyana agi. Nengah pengeran kitai gawa enggau teladan, pesan tu tentu deka ngerembai selampur Sarawak ti dikesayau,” ku iya.

Kaban Parlimen (MP) Selangau enggau Kaban Kunsil Nengeri (ADUN) Ba’Kelalan nya madahka momentum ubah enda ulih diketu lalu pengawa deka chakah agi dipejalai taun tu laban idar astrologi baru nyadi ba taun 2020.

Baru madahka rayat Malaysia patut ngemeranka pengawa ngusung pangan diri enggau ngerami Taun Baru China begulai enggau bala bakih sereta sida ke diau besemak.

“Pakatan Harapan deka seruran netapka penemu ke alai kitai nyadi komuniti pupu bansa ulih begempung milih Malaysia ti beserakup,” ku iya.