Peransang nembiak Dayak ngelala, rinduka main asal

Raban nembiak Dayak patut dibai ngelala enggau diajar pasal main asal sida empu ari umur biak, ari ngaul sida dalam aktiviti tauka pekit belalauka main asal.

Nitih ku Menteri Muda Kaunsil Kandang Menua Datu Dr sekeda program diatur raban bansa Dayak mantaika main asal bukai ari ke mantaika main asal sida empu.

“Aku enda ngenggaika ‘poco-poco’. Aku nemu tu jeman moden, tang anang ngelengka budaya enggau kelai bansa asal kitai,” ku iya lebuh bejaku bejadika Kelas Main Asal 2019 Serakup Dayak Miri (DAM) ba Gymkhana Club ensanus.

Sama datai Datuk Bandaraya Miri Adam Yii, Pemesai Pelilih Miri Abdul Aziz Mohammad Yusuf, Presiden DAM Serawa Budol enggau Chairlady Pengatur Pengawa Jacqueline Selaka.

Ngelansa silik, Penguang madahka mayuh pemain kereban muzik Iban datai ari rebak tuai agi lalu gerempung baka DAM patut berengkah matih rebak nembiak ngambika sida ulih nampung main asal tu ngagai rebak dudi hari.

“Kitai endang patut chakah agi ngelakuka tu (aktiviti main asal). Ambika chunto, baka ba genturung pendiau aku din, aku deka ngatur pekit ‘betaboh’ ngagai bala nembiak mit. Nadai ngira sekalika ulih tauka enda, tang kitai mesti tumu ngaul sida.

“Aku ngasaika kita (DAM) ulih ngereja pengawa ke sama ditu. Dikearap bisi siti bagi (dalam pekit) ungkup nembiak mit laban sida tu ti deka nampung pengawa kitai,” ku iya.

Iya beratika sekeda sida ti betaboh lemai nya datai ari sida ke tuai lalu madah enti rebak nembiak enda disikap nampung pengawa ari sida nya, deka mar amat ngiga orang nyilih sida jemah.

Seraya Kelas Main Asal 2019 DAM berengkah diatur kemari, dipunka Kelas Ngajat, ti deka berengkah ari 4 Februari nyentuk 4 April. Kelas diatur bekerejasama enggau Palan Latih Industri (ILP). Sepenyampau 114 nembiak enggau sida besai tuai nyengkaum ukai bansa Dayak udah rejista ungkup kelas nya.

Kelas bukai di baruh program nya iya nya Kelas Betaboh (muzik asal Iban) ari 4-29 Mac, Kelas Nganyam Tikai (2-31 Mac), Kelas Nganyam Bakul ( 2- 31 Mac) enggau Kelas Ngaga Sugu Tinggi (230 April).

Berebak enggau nya, Penguang mega ngemendarka agih belanja RM10,000 dikena nyaup DAM ngatur aktiviti sida.

“Aku ngarapka kita ulih ngerembaika aktiviti kita ngelui Miri, nyengkau ke Marudi, ngambika mayuh agi rayat nerima pemaik ari iya,” ku iya.