Pengawa numbuhka JKKK dikena ngadaka komuniti ti proaktif
Pengawa numbuhka Komiti Pemansang enggau Pengelikun Genturung Pendiau ( JKKK) di tetiap rumah panjai di nengeri tu siti strategi dikena ngadaka komuniti ti ulih bekereja ngangkatka diri sereta proaktif dalam pemansang.
Menteri Muda Pengelantang Komuniti Sarawak Datuk Francis Harden Hollis madah, organisasyen JKKK iya nya sebuah palan administrasyen ti megai tanggungpengawa berat nyadi pelasar ke paling pemun.
“Nya alai endang siti pekara ti pemadu dikemerat ketuai JKKK diberi latih pengelandik dalam semua pekara bekaul pengawa numbuh, administrasyen, ngatur JKKK sereta pemansang dikena nempa JKKK ti ngembuan juluk ke tinggi, ulih gawa kediri, produktif sereta seruran deka mansang.
“Pengawa nyadi ketuai sereta pengawa ngatur organisasyen ti komited nyadi pekara ti keterubah lalu berat dikena ngangkatka pemansang di genturung pendiau ngambika progresif enggau nitihka atur. Kebuah pia, ketuai komuniti, kteuai di kandang menua enggau institusyen JKKK iya nya ‘focal point’ lebuh ti bekaul sereta berandau enggau raban perintah laban projek enggau bantu ti disediaka perintah deka diberi lalu diterima sereta diatur sida empu,” ku iya.
Iya ke mega Kaban Kunsil Nengeri (ADUN) Simanggang madah munyi nya lebuh ti bejaku ba atur pengawa Pengerami Nyuaka Geran Perintah ngagai JKKK Rumah Igai, Nyakai Jalai Paip Undop, Sri Aman ti bepalan ba Palan Servis Komuniti Parti Bersatu Sarawak (SUPP) Pampang Simanggang ditu, kemari.
Ba pengerami nya, Harden nyuaka geran sepenyampau RM3,000 ngagai JKKK dia ungkup sida bejaaika aktiviti semanjai taun.
Ku iya, ketuai komuniti diatu patut beratika agi bekaul pekara ti nyadi ba kandang endur sida, tanggungpengawa sida napi mayuh penguji lalu seruran berubah seriris enggau ubah ti nyadi diatu laban ekonomi penemu, globalisasyen sereta pemansang teknologi penerang enggau komunikasyen ti laju.
“Ditu mih raban ketuai komuniti patut ngena pengelandik nyadi ketuai ngiring sereta ngemansangka komuniti di genturung pendiau.
“Nya alai, ketuai komunit patut nyadi cheremin sebana sereta peminta nembiak redak lalu ngelengkaka pemerat ungkup diri empu,” ku iya nyemetak.
Ku iya, pemansang ti laju ke dijapai nengeri tu diatu iya nya asil ari komitmen enggau pengeransing perintah sereta bala ketuai ti komited ke udah dipilih rayat sida empu.
Beserimbai enggau nya, semua ti udah dijapai tu mega ar sukung teguh ari mayuh raban kelebih agi rayat diri empu.
“Nya alai, pengawa raya ngaul diri sereta penyereta ti holistik ari rayat ke nyad tagit pemansang ke deka terus diberi pemerat enggau perati,” ku iya nandu.
Sama bisi ba pengerami nya Pemancha Lee Siang Hua enggau Penghulu TIong CHong Onn.