Pengasih, Penyiru Dr Rayong dikenang peranak Engkilili

Robin Enchana, 33, berasai lantang juluk iya nyadi nyata pengudah nerima pemeri kerusi roda.

Pemeri nya datai ari pengasih Kaban Kunsil Nengeri (ADUN) Engkilili Dr Johnical Rayong Ngipa ti siruka pendiau Robin, bepanggai ba sida sebilik lebuh mindah pengudah kaki iya patah ba penusah bebadi kediri empu tiga minggu ke udah.

Pengawa nyuaka pemeri tu diatur pemantu Khas Dr Rayong, Nancy Rangkung begulai enggau raban Nembiak Parti Sarawak Bersatu (PSB) Bagi Menua Engkilili di Rumah Langkop, Marub kemari.

Raban Nembiak PSB sebedau tu dikelala ngena nama Parti Rakyat Bersatu (UPP) tampah rita ketegal sikar gawa ba renggat baruh mantu naka pengulih sida sebedau bantu ari ejensi perintah datai.

Pengari raban nembiak, Melo Agan madahka bantu diberi nadai ngira penemu politik enggau bansa seagi sida beguna bantu.

“Penusah endang enda disadang, tang kami ti nyadi tiang sukung YB Johnical deka mantu enggau naka penyampat sebedau bantu bukai datai,” ku iya madah ngagai Utusan Borneo.

“Dua malam dulu ari tu kami udah ngesah penusah rabat kapitan Lim Siat Min ti midang lalu pagi tu (kemari) nyuaka pemeri kerusi roda ngagai Robin,” ku iya.

Berebak enggau nya, Robin meri tabi puji enggau terima kasih ngagai Dr Rayong ti udah gerah jari nyuaka pemeri nya.

“Nadai jaku bukai ulih disebut aku kelimpah ari terima kasih ngagai (YB) Dr Rayong ti meri kerusi roda ini. Pemanah budi enggau pengasih iya deka dikenang aku belama,” ku iya.

Robin gawa ngatika diri sebedau tu kena penusah bebadi ngujungka iya enda dapat bekereja dalam timpuh ti lama ketegal patah kaki.

Sama datai lebuh nyuaka pemeri nya, Chairman Serakup Tuai Rumah Zon Engkilili Tuai Rumah Johnson Damu, Nancy Rangkung enggau beberapa Raban Nembiak PSB Engkilili.