Raban Indu, Nembiak SUPP pampang Simanggang chakah ngatur program meri bantu pengasih

Raban Indu enggau Nembiak Parti Rakyat Bersatu Sarawak (SUPP) Pampang Simanggang terus komited mantu rayat ti begunaka bantu baka kerusi roda enggau ke bukai di sitak Kunsil Nengeri (DUN) Simanggang.

Ketuai Raban Indu SUPP SImanggang Kapitan Ling SIew Hung madah, raban sida ari bagi indu enggau nembiak diatu benung chakah ngiga peranak di kandang menua tu ti patut diberi bantu bansa nya.

Nitih ku iya, naka ke diatu, bisi dua iku peranak ari kandang menua tu udah nerima bantu kerusi roda ari raban sida iya nya peranak di Rumah VIctoria Merudi, Rampu Wee, Batu Lintang Undop sebedau tu.

“Lalu sekali tu kami mega sama meri bantu ti sebaka ngagai siku ari peranak Rumah Rose Emma Stanley Gate, Temudok Atas iya nya Ng Ah CHang.

“Iya ti diberi bantu tu udah kena sakit strok kenyau tujuh taun ti udah lalu diatu enda ulih bejalai sereta begunaka kerusi roda dikena iya mindah kin kitu,” ku iya.

Ku iya nambah, diatu Ng diibun bini sereta dibantu anak indu iya nyema deka mindah kin kitu lalu naga pengawa ninting hari iya.

Berindik ari nya, ku Ling, sida deka chakah neruska pengawa bansa nya dikena nentuka pengelantang rayat dijaga.