Kena awak TBC ngempitka penegap kaul pupu bansa
Kaban Kunsil Nengeri (ADUN) Bukit Goram, Jefferson Jamit Unyat meri jaku pesan Lantang Ngintu Taun Baru China (TBC) 2019 nuju semua kelebih agi sida ke diau ba sitak N63 Bukit Goram.
‘Aku ngarapka semua lantang ngintu TBC taun tu, ngajihka semua gerai nyamai, betuah, likun sereta diau bebaik lalu kaul kitai bebakih deka tegut agi.
“Bala nembiak besekula teulihka penyulut ba pelajar, sida ti bedagang deka untung besai, sida ti bekereja deka bulih pengidup menyana.
“Semua kitai datai ari pupu bansa deka gawa rat begulai nyadi siti tim ungup pemaik Kapit, menua kitai. Sida ti kemisi deka lantang belepa,” ku Jamit mesan.
Ku Jamit, iya nemu mayuh bala kemisi panjai nyerumba hari besai ti diintu, nyengkaum operator pak kupi enggau restaurant.
“TBC siti ari hari besai diintu peranak Malaysia kelimpah Gawai Dayak, Hari Raya Aidilfitri enggau ke bukai. Bala komuniti kitai ditesau ngabang seraya ngerapitka sintal kaul bebakih.
“Pengawa ngabang tu mega ngambika kitai meretika budaya enggau adat lama dikemeranka bansa nya dikena nerenakka penyerakup dalam pengelain baka kitai ke diau dalam komuniti pupu bansa,” ku Jamit meransang.
Iya deka bejalai ngabang ngagai bala bakih di Sibu enggau Kapit dikena bekunsi ngerami hari besai nya.
Jamit mega ngelalau sida ti mindah jauh ngambika seruran bejimat enggau nyaga pengelikun. Sida ti deriba patut meresa dulu entukar nentuka nadai penanggul sereta beratika atur penge- likun jalai. Sida ti nepan bot tentuka pengangkut ti ditepan nya disikap ngena kereban pengelikun.
Ngelansa pasal penerang ti bisi dikerembai ba media rama, mensia mayuh bebaika gilin lebuh berintai meli minyak ba stisyen minyak, Jamit minta Opis Menteri Dagang Dalam Menua enggau Pekara Bebeli Barang (KPDNHEP) di Kapit matau semak ag bekal minyak nentuka beka chukup.
“Aku ngapil ngagai bala pemesai penerit adat KPDNHEP Kapit ngambika matau bekal minyak nentuka beka nya chukup. Maya musim pengerami baka TBC, aku ngadang mayuh pengusung deka ngusung Kapit nengah darat.
“Peminta mega dipelaba deka nambah, nya kebuah stisyen minyak patut bis bekal tambah dikena nangkup peminta nambah genyit maya musim pengerami.
“Sentang bekal ai paip, iya minta Opis Bekal Ai Menua Pesisir (JBALB) ditu nentuka bekal ai chukup ngagai semua isi bilik. Sida ti gawa, tentuka bisi bekal chukup ungkup semua. Enti bekal ai tejanggal deka nanggul semua pengawa,” ku Jamit nyimpul.