Penyampau penuduk ti deka dikerebut PKR ba PRN bedau diputuska

Parti Keadilan Rakyat (PKR) bedau mutuska penyampau penuduk ti deka dikerebut ba Pengawa Bepilih Nengeri (PRN) ke deka datai.

Chairman PKR Negeri Baru Bian madah pekara nya deka dulu dikerandau ba aum ke diatur kena 24 Februari tu.

“Kitai bedau ngaga pemutus sentang pekara tu, aum deka diatur kena 24 Februari tu.

“Kami deka madah pengudah tembu aum lalu deka dikerandau ba aum bukai nangkan nya,’ku iya.

Baru mansutka jaku nya ngagai pengarang berita rambau ngulu Pengawa Ngelalu Pengabang Taun Baru Cina 2019 ke diatur Sapit Menteri Dagang Dalam Menua enggau Pekara Bebeli Barang, Chong Chieng Jen kena Hari Dua tu tadi, ditu.

Iya ke mega Kaban Parlimen Selangau enda mega netapka sekalika penyampau penuduk ti dikeingin PKR sebaka enggau PRN ke udah.

Ba PRN 2016, PKR nyabung chalun ba 41 ari 82 penuduk Sital Kunsil Nengeri (DUN) tang semina mujur ngenanka 3 penuduk ke sigi dikuasa parti iya nya DUN Ba’Kelalan ( Baru Bian), Batu Lintang (See Chee How) enggau Krian (Ali Biju).

Ngenang kaul bukai, PKR Sarawak diatu benung ngempuru belanja dikena mantu orang ngempu kedai di Spaoh, Betong ti angus kena 4 Februari tu tadi.

Ku iya, pengawa nya nyadi inisiatif parti lalu ke suah sida deka ngempuru belanja dikena mantu orang ke tasah.

“Bisi kaban parti kitai din ti deka ngempuru belanja dikena mantu orang ke tasah lalu nya nyadika inisiatif parti ba tetiap penusah ke bisi nyadi.

Ba penusah nya, lapan iku orang dagang napi pengerugi pengudah kedai enggau palan endur diau iya nya ba ringkat atas angus diempa api.