Begulai ngintu TBC mantaika Malaysia ngembuan penyelai
Patut diteruska dalam semua pekara laban kitai meseti beserakup sereta bekerejasama enggau perintah ngetanka menua
MIRI: Penyerakup ti ditempa maya ngintu pengerami Taun Baru China di menua tu ngayanka Malaysia sebuah menua pupu bansa ti ngembuan penyelai.
Berindik ari nya Kaban Kunsil nengeri (ADUN) Piasau Datuk Sebastian Ting, raban ketuai sereta rayat nengeri tu meseti begulai ngenanka ulah ti ulih begulai enggau pangan diri, penyerakup sereta kerejasama entara komuniti dikena neruska pengelantang ti endang udah lama ditempa ari suba.
“Semua raban patut begulai enggau perintah mutarka penanggul sereta penguji dalam napi petenah enggau gaya politik sereta ekonomi ti enda tentu diatu.
“Sarawak seruran ngenegapka kaul bebakih sereta kaban belayan laban nemu penyerakup nyadi pekara pemun dalam pemansang,” ku iya, bedau lama ti udah.
Sebastian ke mega Sekretari Besai SUPP ti lalu nyadi chairman SUPP pampang Piasau madahka rayat di nengeri tu patut andal diadaka ba tanah Sarawak.
Taja bisi nyadi sekeda penyarut ba rayat ti endang udah ditemu kitai nengeri tu diuan pupu bansa ti enda sebaka jalai pengarap, tang nya enda ulih ngeruga penyerakup entara rayat ti datai ari mayuh macam etnik ba nengeri tu.
Bekaul Miri, iya madahka mengeri Miri iya nya sebuah mengeri ti benung mansang, moden sereta ngembuan mayuh perengkaguna enggau rayat ari mayuh macham etnik.
“Semua rayat di Miri bejalaika tanggungpengawa ti berat nentuka Miri nyadi mengeri dagang temuai ti beresi sereta likun digusung, kelimpah ari ngidupka mengeri tu enggau mayuh macham program,” ku iya nambah.
Ungkup raban penerit adat, Sebastian ngelalau ngambika sida ngemanahka agi tikas pengelikun di mengeri tu nengah mayuh macham aspek lalu nyadika Miri richah, regas sereta narit ati.
“Berindik ari nya aku minta rayat kelebih agi raban ketuai sekalika di renggat perintah ulih bekerejasama enggau begulai lalu nentuka nengeri kitai Sarawak sereta menua tu likun lalu nadai belaya enggau sama diri,” ku iya nandu.
“
Semua raban patut begulai enggau perintah mutarka penanggul sereta penguji dalam napi petenah enggau gaya politik sereta ekonomi ti enda tentu
” diatu.
Datuk Sebastian Ting
ADUN Piasau