PKPIS deka ngatur pengerami makai lemai kena 2 Mac tu ba Hotel Kingwood
Gerempung Pengintu Pengelantang Orang Bumai Iban Sarawak (PKPIS) deka ngatur Pengerami Makai Lemai PKPIS ti bepalan ba Hotel Kingwood kena 2 Mac tu berengkauh ari pukul 6.30 lemai.
Direktor PKPIS Jocky Jim Ungka madahka pengerami nya diatur Komiti Dewan Tetinggi PPIS Nengeri.
“Tu nyadi pengerami ke endang dianti semua kaban gerempung lalu nyangka deka sama bisi digulu Sapit Kepala Menteri Datuk Amar Doughlas Uggah Embas ke mega Menteri Betanam Betupi Moden, Tanah Adat enggau Pemansang Kandang Menua,” ku iya madah ngagai pengarang berita ditu, kemari.
Dulu agi ari nya baum ngatur pengerami tu udah digaga ditu kena minggu siti nyin tadi ke udah betuaika Jocky.
Nitih ku Jocky, pengerami tu diatur enggau tuju deka meri basa ngagai semua kaban lalu ngerapitka kaul entara semua kaban enggau komiti PKPIS.
“Pelasar pengerami tu ulih nyadi palan endur mantaika buah penemu ungkup kaban dalam ngemansang PKPIS jemah ila.
“Kitai ngarapka semua kaban di kandang menua pelilih Kanowit, Julau enggau Selangau kelebih agi ulih datai ngulu pengerami tu ila,” ku iya nambah.
Pengerami nya ila, ku iya, deka dirichahka enggau pemerindang di atas panggau ari penyanyi rikoding menua tu.
“Bisi 50 mija disediaka ngagai sida ti deka ngulu pengerami tu ila,” ku iya.
Mensia mayuh ti deka nyereta pengerami tu kelebih agi kaban ti udah berejister ari baruh PKPIS ulih betelefon enggau Jocky ba lumur 0149555711 tauka emel ngagai nasrullah174@gmail.com ke penerang silik.