PPKKR Sibu ngaga kediri papan tanda ‘No Smoking’ ungkup kaban gerempung nya

Gerempung Pengempu Kedai Kupi enggau Restoren (PPKKR) Sibu udah ngaga kediri papan tanda ‘No Smoking’ tauka enda tau nginsap ungkup disadung ngagai kaban gerempung nya ngambika diengkah ba kedai makai sida empu.

Chairman gerempung nya Tong Ing Kok madah, bisi 800 iti papan tanda udah digaga lalu deka disadung ngagai semua kaban gerempung nya maya Aum Besai Ninting Taun (AGM) kena 10 Mac tu ila.

“Kitai deka meri siti papan tanda tu enggau nadai bebayar, tang nyema sida begunaka lebih, sida meseti mayar.

“Sekeda kaban baka pengempu restoren begunaka paling enda lima papan tanda ke diayan ba kedai,” ku iya seraya madahka gerempung nya diatu bisi 400 iku kaban.

Nitih ku TOng, tu nitihka sida ti beempu kedai pemakai nya ngayanka papan tanda enda tau nginsap di palan sida empu.

“Tang tetiap kedai makai patut ngayangka siti papan tanda ke ulih dipeda klien enggau terang,” ku iya.

Iya madahka sida diberi timpuh enam bulan nitihka atur enda tau nginsap nya ti dipejalai perintah besai berengkah ari 1 Januari tu tadi.

Perintah nengeri Sarawak mega nitihka singkang ti sama bejalaika atur tu berengkah 1 Mac tu ila.