Duit turu ungkup orang ke tasah angus di pasar Spaoh ditumbuhka
Duit turu ungkup ngelempungka tating penusah ngagai orang ke tasah angus ba pasar Spaoh maya nyerumba Taun Baru China tu tadi u dah ditumbuh.
Opis Residen Betong deka ngaduka Duit Turu Penusah Ngenyit Spaoh tu, pia ku Sapit Kepala Menteri Datuk Amar Douglas Uggah Embas ke mega Kaban Kunsil Nengeri Bukit Saban.
Kemari iya enggau MP Betong ,Datuk Robert Lawson Chuat sama bisi nyuaka bantu RM40,000 siku ngagai duit turu nya.
“Duit turu nya mega digumpul dikena nentuka semua bantu ke diberi nya datai ba sida,” ku iya.
Opis Pengelantang Pendiau mega bisi mei bantu baka pemakai, perengka dikena nyumai, tilam enggau pua ngagai sida ke tasah, ku iya.
Kena 4 Februari pukul 1 ngalih hari, api udh nganguska lapan pintu kedai kayu nya.
Ku Ugga iya enggau Lawson berumban ngabas sida ke tasah beratika pengelantang peendiau sida kelimpah nyuaka pemeri ari kuchik seduai ngagai sida ke tasah nya.
Tetiap ruang bilik nerima bantu RM1,000 ngambika bisi dikena sida nyendiaka diri nyambut pengerami makai beserumpu tauka begulai baru.
Muak ke lemai 4 Februari, ugah lalu nguluka aum enggau opis ke bekaul sereta ketuai komuniti berandauka sida ke tasah nya.
“Kami udah berandauka chara, ungkup timpuh pandak, kami deka ngaga alai sida ngenduh. Ungkup timpuh petengan, kami deka nyendiaka kedai sementara lalu kami beratika pekara tu. Ungkup timpuh panjai kami udfah berandauka pelin ngemansang baru palan nya ngena kedai baru ungkup sida ke tasah nya,” ku iya.
Uggah mega madahka raban volunter ngerara api ari Spaoh enggau Betong sereta raban pengerami api ari Balai Betong sama bisi besaup ngerara api maya nya.
Sida udah mujur ngerara api ari nyerarai ngagai kedai ke bukai.
Uggah ke mega Menteri Betanam Betupi Moden, Tanah Adat enggau Pemansang Kandang Menua mega deka ke opis bekuasa ke bekaul mansik kebuah penusah angus nya nyadi.
“Aku melabaka deka nerima ripot nya enda lama agi.” ku i ya.
Nitihka padah Komander Operasyen Opis Pengerara Api enggau Penyah Penusah (Bomba), Vincent Baling Yabi madahka raban pengerara api nya ngenukuka laban buah kedai angus lengis ba penusah nya.
Entara kedai nya empat buah kedai runchit,dua buah kedai kopi, sebuah woksyop mutosikal enggau sebuah kedai nyual perengka dikena berumah.
Nengah penerang berita ti dikeluarka kena 4 Februari, Vincent madahka sebuah lori enggaudua buah van mega bisi angus, tang nadai ripot sentang penusah bakal. Penyampau pengerugi ketegal penusah nya apin ditetapka.