Besaup nyaga pemeresi ba Telok Melano
Ulah enda mereti sekeda temuai ke datai ngagai Telok Melano ngasaka ati nyentuk ngerusak pemanah rampa menua enggau pemeresi pantai nya.
Telok Melano diatu nyadi palan ke chukup dikerindu kelebih agi maya kemisi enggau ujung minggu kenyau Jalai Besai Pan Borneo tembu digaga bulan Januari tu tadi ke nyambung genturung pendiau ke jauh dia enggau menua Sematan, Lundu.
Sitak nya suba sunyi lalu nadai mayuh tujah entukar, diatu berubah nyadi sekut kelebih agi maya ujung minggu ti ngemataka mensia mayuh beambi ulih bejalai ngagai endur nya.
Pia mega, enti suba nadai kala jalai alun sekut tang diatu nyau majak mayuh mensia datai laban deka meda pemanah rampa menua ba endur tu.
Enggau pejalai urung dua jam ari Kuching ke Telok Melano, nya ngemuntang agi mensia mayuh raun ngagai palan tu.
Tang, pekara ke ngasuh asa ulah sekeda temuai ti enda mereti sentang isu pemeresi lalu muai uras sebarang ngujungka kandang pantai dipeda kamah lalu bisi ayan ba media rama Facebook.
Berindik ari nya, Kaban Kunsil Nengeri ( ADUN) Tanjong Datu Datuk Amar Jamilah Anu ngelalau bala temuai bela nyaga pemeresi palan nya.
“Aku chukup gaga meda pemayuh penatai mensia ngagai i Telok Melano kenyau Jalai Besai Pan Borneo tembu lalu dipenyadika Kepala Menteri Datuk Patinggi Abang Johari Tun Openg kena 26 Januari tu tadi.
“Kenyau iya dibuka, mayuh peranak ari selampur nengeri Sarawak nemuai kitu pengydah meda gambar enggau video pemanah rampa menua Telok Melano ke bisi dipekunsika bala bakih ba media rama,” ku iya nengah sebengkah penerang ditu kemari.
Jamilah madah, penyampau temuai ke datai ngagai Telok Melano kena 5 Februari tu tadi, iya nya ba hari keterubah Taun Baru China chukup mayuh ngujungka jalai alun sekut ba kandang nya.
Nya kebuah, mayuh sida ke datai mantaika sebana diri pasal penanggul ke ditapi diri.
“Maya pengerami Taun Baru China, aku enda ulih begulai enggau bala temuai ba Telok Melano laban udah bisi pejalai bukai, aku endang deka begulai enggau sida din tang jam nadai meri awak aku begulai enggai sida.
“Laban ke nyadi pengari rayat ba Telok Melano, aku meri terima kasih ngagai semua temuai ke datai laban udah meri awak nemuai kitu, lalu aku minta ampun ketegal penanggul ke diasai bala temuai engka nya ketegal kelalu mayuh orang datai beratika pemanah rampa menua Telok Melano tu,” ku iya.
Iya madah, penanggul nya enda disengaja lalu perengkaguna ke bisi ba Telok Melano mega agi dilanggur deka dikemanah agi.
“Nya alai, kitai ngarapka semua temuai ke udah kitu enda jera datai baru nganti perengkaguna udah dikemanah menyana agi.
“Aku mega udah berandau enggau opis menteri sereta ejensi bekaul enggau ngemanah agi perengkaguna ke diguna ba Telok Melano baka tong uras, palan engkah kerita, agu mensia mayuh, palan bedagang enggau ke bukai ti meri pengelantang ngagai temuai,” ku iya.
Kelimpah nya, iya madah temuai ba Telok Melano patut disediaka perengkaguna baka palan bemalam awakka sida rindanga agi datai kitu.
“Laban ke nyadi pengari rayat ke dipilih ba Tanjong Datu, aku ngarapka Telok Melano terus nyadi palan dagang temuai ke laku sereta tebilang di nengeri tu,” ku iya.
Kemari, iya begulai enggau Sekretari Kaunsil Pelilih Lundu Norashikin Brahim, Pemesai Pelilih Lundu Gustian Durani, bala kaban kaunsil, pemesai Unit Injinir, Pengerai enggau Servis Mengeri sereta Penerit Adat ngabas pantai Telok Melano.
Ku iya, pejalai nya betuju beratika perengkaguna ke diguna laban diatu palan nya nyadi sebengkah ari palan baru ditapatka bala temuai.