KM enggau bini iya ngabang ngagai ketuai komuniti China di Bintulu
Kepala Menteri Datuk Patinggi Abang Johari Tun Openg enggau bini iya Datin Patinggi Jumaani Tuanku Jaafar udah ngabang Taun Baru China ( TBC) ngagai Bintulu kemari.
Enam iku ketuai komuniti enggau orang dagang besai dia udah alai seduai ngabang ti disempulang bala menteri enggau menteri muda sereta bini sida.
Sida keterubah endar ngabang ngagai rumah Temenggong Datuk Barry Yek ba Starhill, Jalai Tun Hussein Onn pukul 10.45 pagi.
Kepala Menteri enggau raban iya ngabang dia urung 30 minit sebedau ngagai rumah kedua di Taman Li Hua, Jalai Tun Hussein Onn ti diatur Pemancha Datuk Francis Toh Chiew Peng.
Nangkanka nyar, Yek Siew Long, anak lelaki niang siku orang dagang besai Tan Sri Yek Min Ek enggau sida sebilik ngelaluka penatai Abang Johari enggau bini iya ba rumah sida di Taman Hock Lee, Jalai Sultan Iskandar.
Kepala Menteri enggau raban iya datai ba rumah presiden Gerempung China Bintulu, Hii Toh Him urung pukul 11.40 pagi di Jalai Tun Khatib, MLNG Housing, Tg Kidurong.
Rumah kelima TBC ke endur sida ngabang iya nya rumah Penghulu Dato Chai Shong Phian di Lucky Garden, Jalai Tanjung Batu sebedau nembuka pejalai ngabang TBC ba rumah Kaban Kunsil Nengeri Repok Dato’ Sri Huang Tiong Sii ba Taman Emas, Tanjung Batu Jalai Durian Tembaga.
Pengawa mandangka tanda singa, melah kek enggau ngirau ‘yee sang’ besis dipejalaika ba rumah bala endur iya ngabang Taun Baru China nya.
Sama bisi enggau Menteri Utiliti Dato Sri Dr Stephen Rundi Utom, Minteri ba Opis Kepala Menteri ( Integriti enggau Ombudsman) Datuk Talib Zulpilip,Minteri Muda Elekterik Menua Pesisir Dr Abdul Rahman Junaidi,Kaban Kunsil Nengeri Samalaju Majang Renggi, Kaban Kunsil Nengeri Murum Kennedy Chukpai Ugon, Residen Bintulu Jack Aman Luat enggau D. O Bintulu, Muhammad Dino Amid.