SRDC deka ngambi kunteriktor baru ungkup pengawa ngumpul uras domestik

Opis Kaunsil Menua Pesisir Sibu ( SRDC) deka ngambi kunteriktor baru dalam pengawa ngumpul uras domestik ba semua lima zon ti dipegai opis nya.

Chairman SRDC Sempurai Petrus Ngelai madahka SRDC sebedau tu udah mutuska enda ngemaru kunterik ungkup kunteriktor lama sepengudah abis 31 Disember taun nyin tadi.

Ku iya, pemutus enda ngemaru kunterik ti dipenggi kunteriktor lama digaga sepengudah ngira mayuh pekara nyengkaum timbal ari kaban opis kaunsil sereta mensia mayuh.

“SRDC udah mayuh nerima sebana ari kaban opis kaunsil sereta mensia mayuh bekaul tikas pengawa kunteriktor ti empelita. Raban opis kaunsil enda bebatak asur enggau kualiti servis ti enda ngemuaska ati nya.

“Nya alai aku ngarapka, kunteriktor baru dichiri tu ila ulih ngayanka kualiti servis ti nyulut,” ku iya.

Sempurai madahka, SRDC seruran enggau naka ulih mekuh ngagai kualiti servis ti diberi ngagai rayat.

Tu nyengkaum meri awak ngagai mensia mayuh meri timbal ba tikas pemanah servis sida nengah sebana ti diterima.

Kelimpah ari nya, raban opis kaunsil mega bebendar deka ngurangka kes penyalah enchuri tauka vandalisme ti digaga ba tong uras ke dibekalka SRDC.

Ku iya, perintah udah melanja sepenyampau duit ti mayuh dikena meli tong sampah ungkup guna mensai mayuh tang chukup sinu, tong tu dichuri lalu nyadi tagit penyalah vandalisme.

“SRDC deka nentuka semua pengawa digaga enggau meruan dikena nyeliahka tong uras dichuri, dipenyati tauka ditunu,” ku iya nyemetak.

Berindik ari nya, iya ngelalau mensia mayuh ngambika ulih nyadi mata enggau pending SRDC lalu sama begulai nyaga reta ti dipenggi mensia mayuh.