Mawan ngarapka pengelantang pendiau peranak Sarawak ti ditan ba Kemboja diperati
Presiden Gerempung Bansa Dayak Sarawak ( SDNU) Tan Sri William Mawan ngarapka raban bekaul seruran beratika pengelantang pendiau 47 iku peranak Malaysia nyengkaum 44 iku peranak Sarawak ti ditan ba Kemboja ti dipelaba ngambi bagi dalam operasyen judi online chara belalai.
Mawan ti mega Kaban Kunsil Nengeri ( ADUN) Pakan madahka SDNU enda malut aktiviti chara belalai, iya mega ngarapka pengelantang pendiau sida ditan tu diperati dalam langkar kereja ari sistem undang-undang Kemboja.
Ku iya, iya ulih ngasaika pengirau, penusah ati enggau pengasa apai indai ba penanggul bala anak sida ba menua tasik ketegal sebarang kebuah.
Iya madahka, kelebih agi peranak Sarawak ditan semampai ngaul diri semak enggau ngemaruka penerang Konsulat Malaysia di Phnom Penh ba sebarang penerang pemadu baru ngaul sida.
Mawan mega ngarapka apai indai bala nembiak ti ditan ngaga ripot polis ba sebarang opis polis besemak ngambika mantu raban polis ngempung penerang ba pansik sida nyangka bisi ulah bedagangka mensia enggau penyalah sindiket antarabansa.
“Lebuh ngiga kereja ba menua tasik, bejimat lalu anang nitihka peneka ati. Uji perati enggau serenih dulu pemanah nama ejensi ngambi orang gawa dulu sebedau ngaga pemutus ninggalka menua,” ku Mawan madah ngagai raban nembiak di Sarawak.
“Pekara ti udah nyadi ulih muka mata laban nyadika ajar beguna amat ngagai sida ti ngiga kereja enggau raban nembiak,” ku iya nambah.
Berebak enggau nya Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah madah laban kes nya udah ngaul dua menua, iya ngarapka raban konsulat Malaysia di Phnom Penh nyendiaka sanding penemu undang- undang ngagai 47 iku peranak Malaysia ti ditan tebal agi bala nembiak.
Ku Fatimah, sebarang asi ari kes udah tu, peranak Malaysia meseti bebasaka undang-undang enggau sistem undang-undang Kemboja.
“Aku ngarapka sida tu diberi sanding penemu undang-undang ti meruan enggau penyanding penemu lalu pengelantang sida deka diintu memanah,” ku Fatimah t mega ADUN Dalat.