Siku LeftenanTLDM ditan SPRM ketegal meri peminta palesu

Siku Pemesai Soldadu Tasik Diraja Malaysia (TLDM) udah ditan Komiti Nagang Makai Suap Malaysia (SPRM) kemari dikena mantu mansik kes peminta pelesu suwa bas enggau nyendiaka servis katering dipelaba beungkus lebih RM16,000.

Nitihku penerang, Pemesai TLDM bepangkat Leftenan tu beumur 30 taun udah ditan urung pukul 9.50 pagi kemari ba Opis SPRM Sarawak, maya datai meri penerang.

“Pemesai TLDM nya dipelaba udah bepekat enggau tiga iku agi saspek ke dulu agi ditan maya nganjung invois ti ngundan penerang pelesu bekaul servis suwa tiga buah bas enggau servis katering beserimbai enggau latih nimbak TLDM kena Oktober 2017 tang kebendar servis nya nadai,” ku penerang media nya kemari.

Berebak enggau nya, maya pengawa nyerungkai rumah saspek sebedau tu, bisi ditemu duit lebih RM14,000 ba dalam siti sampul surat.

Duit nya mega dipelaba asi peminta (kelim) digaga siku saspek lalu deka dibagi ngaga sekeda saspek.

Nitihku penerang saspek deka dipansik nitihka Seksyen 18 Akta SPRM 2009.

Udah nya, Direktor SPRM Nengeri Sarawak, Razim Mohd Noor maya dikerandau ngenuku pekara nya tang iya enggau meri timbal bekau enggau kes nya.