Gerawat temegah meda sukung tegap tetiap tuai rumah di Poyut/Lubok Nibong
Sapit Speaker Dewan Kunsil Nengeri (DUN), Dato Gerawat Gala chukup temegah enggau sukung tegap ari tetiap tuai rumah ba sitak nya kelebih agi ba kandang menua Poyut/Lubok Nibong.
Kebuah pia ku iya, tetiap pengawa diatur semua tuai rumah ngelalu penatai iya ngena chukup basa, tu pengawa dikemeran kita ti chukup dibasa iya.
Bekaul enggau pengawa deka ngentak rumah panjai baru ti ngemai reti rumah panjai nya udah sedia nyingkang nuju pemansang lalu tu nyata ngayanka peranak dia keran deka bekerejasama.
“Maya kita udah bisi rumah panjai baru lalu tentu semua deka baru magang baka ramu berumah, kereban enggau ke bukai,” ku iya.
Pengudah kita bisi rumah panjai baru, reti iya kita bisi kelai baru enggau budaya mega baru.
Dato Gerawat Gala ti mega Kaban Kunsil Nengeri (ADUN) Mulu mansutka jaku tu lebuh bejaku ba pengawa nasih tanah 20 pintu bilik Rumah Jamet Angol, di Sg Stapang A semak ditu, apin lama ke udah.
“Aku nemu, ukai pengawa muntang ngentak rumah panjai baru laban begunaka mayuh belanja lalu ari pemeri mimit tu, dikearap rumah panjai tembu nitihka timpuh.”
Gerawat mega besemaya nguji mantu Sg Stapang A ngulih bantu belanja mayuh agi diinjau ari Housing Development Co- operation (HDC).
Mensia mayuh mega dipadah pasal bekal ai beresi deka disambung taun tu laban tinda udah diberi ngagai sida ba kandang menua Poyut/Lubok Nibong.
“Taja udah dikemendarka aku dalam bulan Mei 2016, tang ketegal Pengawa Bepilih Besai Ke-14 (PRU14) enggau Perintah Pakatan Harapan (PH) menang bepilih, projek kitai dikinsil Perintah PH. Tang diatu Perintah GPS deka ngambi semua projek ti udah disemaya.
“Aku deka meda projek bekal ai beresi deka tembu disambung enda lama agi, enti enda, aku enda nemu dini deka mantaika mua,” ku iya.
Berebak enggau nya, Dato Gerawat udah ngemendarka geran MRP sepenyampau RM40,000 ungkup Wang Turu Ngentak Rumah Baru JKKK Sg Stapang A, RM3,000 ungkup Biro Indu ( SIDS) Sg Stapang enggauRM3,000 ungkup Rukun Tetangga Sg Stapang A.
Sama datai SA Reagan Edwin, Penghulu Randi Bundan Kaunsilor Jimnbau Ena sereta bala tuai rumah ke bukai.