BNM deka ngatur ‘Karnival Kewangan’ kena 23 enggau 24 Februari di Miri

Bank Negara Malaysia (BNM) enggau kerejasama raban ti bekaul deka ngatur ‘ Karnival Kewangan’ ba Permaisuri Imperial City Mall kena 23 enggau 24 Februari tu.

Program nya nyangka deka dipenyadi Penulung Gabenor BNM Abu Hassan Alshari Yahaya, ke mega bisi diselit enggau mayuh aktiviti ti narit penyereta komuniti di kandang menua nya datai lalu meri empas ke besai ba sida.

Entara aktiviti besai ke deka diatur nyerumba karnival nya baka program meri penyedar penyalah bekaul pekara wang dikena nyeliahka sida ditipu nengah modus operandi ‘duit jali ke enda dibayar’ ti suah nyadi tagit orang ke ngadu penyalah nya.

Mensia mayuh mega bela dikeingat ngambika enda kiruhka orang ti betelefon ke enda ngenyenangka ati, bekunsi penerang diri tauka ngayanka penerang bekaul akaun bank nyengkaum kad kredit enggau ‘ password’ ngambika ulih nyeliahka sida ditipu.

Nya alai, mensia mayuh bela dilalau ngerichahka program nya kelimpah buih mayuh penerang ti manah bekaul pekara wang sereta akaun bank.

Kelimpah ari nya, National Association of Malaysian Life Insurance & Family Takaful Advisors (NAMLIFA) Pampang Miri enggau kerejasama BNM nengah program tu mega bisi ngatur ‘Run For Insurance 2019’ kena 24 Februari 2019.

Urung 2,000 iku pesereta nyangka deka ngambi bagi dalam pengawa meri penyedar ngagai mensia mayuh bekaul pemerat insuran ti ulih mungkur pengelikun penatai pemisi diri enggau sida sebilik.

Program belanda beserimbai enggau ‘Karnival Kewangan’ nya deka diatur ba Dataran Kipas Miri berengkah pukul 6 pagi.

Program ‘Run For Insurance 2019’ deka dibagi ngaga empat iya nya kategori belanda 10km, kategori 5km, kategor Fun Run 3km enggau kategor Family Run.

Tu mega mai reti meri penyedar ngagai komuniti bekau pemerat bisi insuran ti nyaga ukai semina ngagai kitai empu tang mega ngagai diri sebilik ke bukai.

Program nya ti keterubah diatur lalu pekayan sukan sepenyampau RM5,000 mega nyadi siti ari perais nyabut tiki benasit maya nya ila.

Asil ari duit bayar nyereta program belanda nya deka diberi ngagai gempung pengasih ti udah dipilih iya nya Palliative Care Children Cancer Society sereta Pusat Dialysis Bulan Sabit Merah.

Menteri Muda Dagang Temuai, Seni enggau Main Asal Datuk Lee Kim Shin nyangka deka datai nyad temuai ti dipebasa bejadika program nya.