SMC udah melanja RM23 juta dikena nyeruri, ngemanah jalai enggau parit di Sibu
Opis Kaunsil Mengeri Sibu ( SMC) udah ngena sepenyampau RM23 juta dikena nyeruri sereta ngemanah jalai enggau parit di Sibu taun nyin kemari.
Chairman SMC Datuk Tiong Thai King madah, opis nya udah ngena belanja tambah urung RM4 juta ungkup pengawa ngintu enggau ngemanah jalai ti suah ditengah baka nyeruri jalai ti belubang enggau jalai ti bisi tekerap.
“Kitai minta kerejasama mensia mayuh dalam pengawa bejalaika projek nyeruri enggau ngemanah jalai sereta parit, lalu pengawa tu deka mekuh dulu ngagai sida ti diau di kandang menua ti baruh sereta ke suah napi penusah ampuh bah,” ku iya nerang nengah teks ke dibacha sapit chariman SMC Rogayah Jamain ba aum SMC bedau lama ti udah.
Tiong mega nerang SMC udah melanjaka urung RM5 juta ungkup ketetiga projek nyeruri parit, RM1 juta dikena ngintu enggau ngemanah jalai alun sereta lampu trafik lalu urung RM8.5 juta ungkup pengawa muai barang enggau ai ti enda diguna.
“SMC besemaya deka neruska kereja ngintu enggau ngemanah infrastruktur nitihka pemisi opis kaunsil dalam meri servis ungkup menger tu ti pemadu manah ngaga peranak di Sibu,” ku iya.
Kelimpah ari nya, Tiong madahka SMC udah ngumpu RM38.8 juta chukai taksiran nyentuk 31 Disember 2018 lalu penyampau tu iya nya urung 94.56 peratus ari penyampau asil taun tu.
“SMC mega udah ngumpu 44.66 peratus chukai ke bedau dibayar ti sepnyampau RM3 juta. Kitai ngarapka sida ti mayar chukai terus mer kerejasama enggau sukung sida dalam mantu SMC mer servis ti pemadu manah ngagai peranak Sibu,” ku iya nerang.