Semua komuniti patut bebasaka pangan diri ke pengidup ti lantang, likun

Ulah bebasa ke pangan diri tau ngasup pengidup komuniti lebih lantang enggau penuh pengelikun.

Menteri Muda Utiliti (Bekal Karan) Datuk Dr. Abdul Rahman Junaidi madah nya endang udah nyadi tanggungpengawa semua piak nurunka purih nya ngagai nembiak rebak baru.

“Kitai patut berasai temegah enggau pemisi kitai taja diau begulai ba mayuh adat, bansa, jaku enggau pengarap ke enda sebaka tang kitai agi ulih diau bebaik enggau pangan diri.

“Tu mih pemanah enggau penyelai kitai ba Sarawak, kitai bansa Sarawak ari mit nyentuk ke besai seruran ngemeratka penyerakup taja bebida adat, jaku enggau main asal.

“Nya mih nyadi pengering enggau pemansang Sarawak, sehari tu,” ku iya maya bejaku ba Pengerami Gong Xi Fa Cai (Taun Baru China) Renggat DUN Pantai Damai 2019 ditu kemari.

Iya ke mega Kaban Kunsil Nengeri ( ADUN) Pantai Damai madah, pengerami nya ukai semina diintu bansa China aja tang mega semua bansa ke bisi ba nengeri tu.

Pengerami TBC tu enam kali udah diatur ba sitak genturung tu ke diuan urung 200 peranak bansa Tionghua.

Pia mega, piak komiti genturung pendoau ba dalam sitak nya mega bisi nyambut pengerami Krismas, Gawai, Hari Raya enggau Thaipusam ninting taun.

Nya alai, rayat ukai semina berami tang mega beripai enggau pangan diri ngereja aktiviti komuniti enggau ke bukai.

Abdul Rahman mega madah diri deka meri agih belanja dikena meli pekayan singa chura mirah ungkup pengerami Taun Baru China taun dudi.

Piak iya mega bisi meri bantu pengelantang pendiau ngagai 30 iku peranak ke OKU (timpang pediau), orang tuai enggau sida ke enda dapat gawa.

Bela bisi datai Ketuai Parti Pesaka Bumiputera Bersatu ( PBB), Ranting Bandar Baru Samariang, Azmi Abdul Rani enggau Ketuai Gerempung China Taman Perumahan Bandar Baru Samariang, Robert Lee.