Nempa penyulut nembiak ba pelajar entara juluk besai tim Projek Pensel
Tim Projek Pensel ngena awak kemisi sekula nyerumba hari besai Taun Baru China ( TBC) ngatur aktiviti sida ba mayuh bengkah rumah panjai, sekula enggau palan bukai.
Pemanah timbal enggau peminta diterima ari mensia mayuh kelebih agi komuniti rumah panjai enggau raban sekula ba sitak Simanggang nyadika peransang tim tu gagit agi ngemujurka tuju enggau juluk sida.
Kandang seminggu ke udah, diketuaika pemungkal Projek Pensel, Norina Umoi Utot, tim sida mungkal pejalai sekali tu napatka Rumah Musa, Sutong di Simanggang kena 3 Februari.
Sida sebuat udah nyuaka set pensel enggau ngenataika licha peransang pelajar ngagai 16 iku nembiak mit ba rumah panjai nya seriris enggau juluk taun 2019 sida ti ngemeratka pelajar ari renggat tumu.
“Kami sebuat endang keran deka nyaup apai indai, sekula enggau bala komuniti bukai ba pekara pelajar, kelebih agi ngaul bala nembiak mit, enti ulih berengkah diterenak ari pra sekula, ngemerat enggau ngemeranka pelajar,” ku Norina.
Tim nampung pejalai sida ngelawa Rumah Wing, Gua Sukat agi dipegai sitak Simanggang kena 4 Februari, ke alai 30 iku nembiak sekula primari nerima pemaik ari licha peransang pelajar projek nya. Norina disaup ex-kepala pengajar, James Lungkong ti nyadi chairman Projek Pensel Sri Aman.
Muakka malam, Norina bisi nerima kangau ari raban Kawasan Rukun Tetangga (KRT) Kampung Temuduk Baru, Sri Aman, datai ngulu pengerami ngintu TBC, disempulang bala kaban ari Pakatan Harapan (PH) Sri Aman ke bukai.
Nerima kangau ari raban sekula nyengkaum Serakup Apai Indai enggau Pengajar (PIBG) nyadika basa chukup besai ngagai tim Projek Pensel sekali tu.
“Tu kelai sukung tegut sereta ngayanka sida udah sedarka kerejasama rat ngemansangka pelajar nyadi tanggungpengawa semua raban lalu ukai semina dilempai ngagai sekula enggau pengajar aja,” ku Norina.
Kena 5 Februari, sida sebuat nangkup peminta ari PIBG Sekula Primari (SK) St Paul di Banting, Lingga. Pejalai nengah ai nyauka sejam pengelama ari Pasar Lingga napatka menua Banting laban apin bisi sambung jalai darat.
“Pejalai kami sebuat likun datai ba menua dilawa taja ngelaban ujan bangat serantau jalai. Tu peneleba chukup berega ngagai kami, kelimpah ngasaika penusah ditapi peranak ti diau jauh ke ulu sungai.
“Penatai kami mega disambut ngena chukup basa. Baik nya ari chara ngelalu dataika merarau, kami dinah bemacham bansa pemakai rumah panjai baka undang galah ti tebilang ba menua Banting,” ku Norina ngelansa pejalai sida.
Batang tuju pejalai sida endang deka meri licha peransang pelajar sereta nanggam kaul rat begulai enggau bala nembiak enggau pengajar sereta PIBG.
“Pangku pengawa PIBG chukup besai reti ba pemansang pelajar bala nembiak seraya nyaup bala pengajar enggau sekula nempa modal mensia ti menyana enggau bepenau, pintar runding sereta landik ba sebarang pengawa nitihka peminta dunya kemaya hari,” peransang Norina lebuh belicha ba mua mayuh.
Taja bejarit hari ngatur aktiviti nadai ngasuh tim Projek Pensel sebanaka diri lelak tauka ‘madai isi’, tang ngasuh sida majak gagit laban nerima timbal chukup manah ari semua.
Licha peransang pelajar datai ba hari keempat, 6 Februari, diatur ba Rumah Edward Jantong, Sebujok di Sri Aman bejalai lanchar. Sepenyampau 98 iku nembiak sekula primari datai ngulu licha tu seraya ngiri penemu enggau nambahka penemu baru.
“Mayuh batang jurai pasal pelajar sekula disara datai ba awak tanya saut. Apai indai gagit deka nemu penerang silik agi ba sekeda pekara ti agi rapas reti ba sida.
“Tu ubah runding ti manah amat. Enda baka kitai suba, apai indai semina nejuka bala anak ngatika diri lebuh besekula. Enti ati enda rans- ing ngujungka sida badu lalu runding semina naka deka nemu macha enggau nulis aja,” ku Norina temegah.
Pejalai tim Projek Pensel ba hari kelima, 7 Februari, napatka SK St Martin, Lachau, Sr Aman pengudah nerima kangau ari kepala pengajar enggau chairman PIBG sekula nya.
Ngelansa pasal SK St Martin ti ditumbuh dalam taun 1963 urung 60km penyauh ari pasar Sri Aman lalu besemak enggau Pasar Lachau nyentuk sehar tu agi ngena injin api ngulihka bekal kuasa karan sereta nada ngembuan bekal ai beresi.
“Suah mega injin api diketu urung pukul 10 malam dikena ngelimat belanja bebelika minyak laban belanja diagih ngaga sekula enda chukup.
“Nya kebuah tim Projek Pensel deka bekerejasama enggau PIBG sekula tu ngatur aktiviti dikena nyaup sida ngiga belanja,” ku Norina mantaika sempekat sida.
Norina madahka renggat pejalai tim Projek Pensel sekal tu deka seruran ditampung lalu sida deka beratika peminta ari raban ti begunaka servis tim nya kelebih agi ngaul pelajar sekula.
“Jaku pejah diambi nyadika peransang kami nyingkang jauh agi ke mua, ransing enggau puh agi ati gawa lalu jaku puji endang diambi kami ke kenang dudi hari,” ku Norina nyimpul jaku diri.