Gerempung di nengeri tu meseti ngatur program bekaul komuniti
Tetiap gerempung di nengeri tu ditangkan ngambika ngatur aktiviti bekaul komuniti dikena nerenakka penyerakup entara komuniti pupu bansa.
Menteri Muda Pengelantang Komuniti Sarawak Datuk Francis Harden Hollis madah, perintah seruran meransang tetiap raban bansa nyereta gerempung dikena nambahka runding ti ulih bekerejasama sereta ulih begulai enggau pangan diri.
“Penyereta raban bansa dalam gerempung di nengeri tu endang berat dikena nentuka juluk ti dekaka rayat ke teguh begulai sereta lantang senang,” ku iya.
Lebuh ti ditemu maya pengawa nyuaka Bantu Pengelantang Pendiau ngagai sebuah ruang bilik orang lunggar umur Hew Fong Sin di rumah iya ba Jalai Foochow, Sri Aman ditu pagi kemari, Harden nyemetak madahka gerempung sama bisi tanggungpengawa ti berat dalam ngelakuka adat sereta main asal pupu bansa di Sarawak.
“Tetiap raban bansa di nengeri tu ngembuan adat sereta main asal ti nyelai. Nya alai nengah pengawa begerempung, kitai mega deka teulihka peluang dalam ngangkatka nya tinggi agi,” ku iya.
Ku Harden nambah, ulah ti ulih bekerejasama, enda ngelusu sereta lurus dalam raban ketuai sereta kaban gerempung nyadi pekara ti dikemerat dikena ngetanka tikas pemanah sebuah gerempung.
“Pekara ti bansa nya patut bisi dalam tetiap gerempung dikena nentuka gerempung seruran regas sereta ngetanka kerejasama enggau pangan diri,” ku iya.
Sama bisi datai ba pengerami nyuaka bantu nya Penulung Pemesai Pemansang Komuniti ba Opis Pengintu Pengelantang Komuniti Bagi Menua Sri Aman Kisamudin Kiprawi enggau Pemantu Pemansang Komuniti ari opis nya Hamilie Sahat.