Pemansang ekonomi, infrastruktur di Sibu ulih dijapai nengah SDB

Menteri Dagang Antarabansa enggau e- Dagang, Dato Sri Wong Soon Koh berasai lantang enggau perambu numbuhka Opis Pemansang Sibu ( SDB) ti nyadika chara ngerembaika agi pemansang mengeri tu dudi hari.

Wong ti mega Menteri Wang II bela mantaika penemu ngagai SDB ngambi Temenggung Datuk Vincent Lau Lee Ming enggau Temenggung Datuk Wan Hamid Edruce nyadi ketuai sida.

“Semua kitai nemu pemansang ekonomi enggau pemansang infrastruktur di Sibu enda bangat ngerembai naka ke diatu.

“Tang enti SDB betuaika Lau enggau Wan Hamid, kitai ngarapka ulih megai sereta ngelangkar pelin baka ni chara dikena nge- mansangka mengeri Sibu dalam kandang dua tiga taun ti deka datai,” pia ku iya maya bejaku ba Pengerami Taun Baru China Gabungan Persatuan Cina Sibu ( UCA) di sebuah hotel ditu, malam ensana.

Pengerami tu digulu Tuai Megai Menua Tun Pehin Sri Abdul Taib Mahmud enggau bini Toh Puan Datuk Patinggi Raghad Kurdi Taib.

Bela datai iya nya Sapit Kepala Menteri Datuk Amar Awang Tengah Ali Hassan, Presiden UCA Ngieng Ping Sing sereta bala bukai.

Wong madah, industri bekenaka kayu enggau industri ngaga kapal majak kusut ari taun siti ngelawa taun siti.

“Dua bengkah industri tu betapi enggau macham penguji. Pia mega industri mit enggau jelan pemesai ti bela ngasaika pekara nya maya hari tu.

“Nya alai, kitai ngandalka SDB ulih nyungkakka ag pengerembai pemansang Sibu dua tauka tiga taun tu nengah tiga iti sektor iya nya dagang temuai, betanam betupi enggau pelajar,” ku iya madah baru.

Nerang enggau silik sentang SDB, ku Wong iya deka nyadi koordinator tauka nyadi jematan antarra SDB enggau perintah nengeri.

“Aku deka nyadi fasilitator ba tuju kitai ngemansangka Sibu.

“Nama ke digaga kita diatu deka mai pemaik ngagai pemansang Sibu dudi har ila,” pia ku iya.

Kelimpah Lau enggau Wan Hamid nyadi ketuai, SDB bela dikeringka bala tuai raban bansa, pemesai korporat enggau Presiden UCA.