Dewan Bandaraya: Pesaka Abang Johari ungkup Miri
Pengawa ngaga Dewan Bandaraya deka nyadi pesaka Kepala Menteri Datuk Patinggi Abang Johari Tun Openg dikena ngenang jasa iya ngagai peranak Miri.
“Projek tu deka nyadi pesaka aku. Abis nadai rayat nemu lebuh aku nyadi Kepala Menteri, aku bisi ngaga Dewan Bandaraya,” ku iya madah malam kemari.
Bejaku rambau Pengerami Makai Lemai Taun Baru China ( TBC) Parti Sa’ati Rayat Sarawak (SUPP) MiriSibuti, Abang Johari madahka projek berega RM70 juta nya beguna amat dikena ngenegapka agi nama Miri nyadi mengeri besai kelimpah nyadika kelai dikena matak penatai temuai.
Ku Abang Johari, Taman Pusat Miri Marina Parkcity dipilih nyadi taba projek laban nyadi endur pemansang baru sereta ngembuan ‘feng shui’ manah, nunga tasik.
Beberapa raban mejah enggau ngenggaika perambu perintah nengeri ngaga begunan nya ba endur nya.
Ku Abang Johari nambah, dagang temuai nyadi agenda besai perintah nengeri ngemansangka ekonomi Miri ti mega ngaul projek ngemanahka perengka guna ba Taman Negara Niah.
Gua Niah nyadi pesaka asal sejarah mensia pengudah dikelala nyadi pengentap pendiau mensia pemadu tumu kenyau ari 65,000 taun.
Dikena ngidupka baru gaya rampa lama ba indu mengeri, perintah nengeri deka nukar ex-opis Residen enggau Pelilih nyadi muzium budaya.
“Kitai setuju, Opis Residen ke dulu suba deka nyadi muzium enggau palan main asal. Kebuah pia laban endur pesaka asal deka nyadi palan main asal lalu chara dikena ngemanahka kandang ngelingi nya.”
Ngelansa pasal palan penyangkai kapal Miri, iya udah bisi chara mutarka penanggul nanga sungai pabu di Kuala Baram ti begunaka pansik silik enggau agih belanja besai.
Randau pasal pekara tu mega udah diatur begulai enggau raban Kaunsil Penyangkai Miri (LPM) dua bulan ke udah lalu pengawa ngerawang nanga sungai Kuala Baram nyangka deka dipejalai.
“Kitai deka ngatur pengawa pasal penyangkai Miri nyengkaum gudang ba Sungai Miri. Kitai deka beratika belanja enggau alir sungai diatu sekalika deka bejalaika iya laban begunaka belanja dikena ngintu.”
Sentang projek berumah ba pengentap baru pendiau, perintah nengeri deka nanggung belanja kereja nimbuk tanah, ngaga jalai belakin enggau parit semin ba polisi baru iya.
Perintah deka ngaga rumah berega RM60,000 ngagai RM150,000 ngambika rayat bepenatai pemisi baruh bisi rumah kediri empu.