Perintah patut ngidupka baru ATC Kapit, ngemansangka betanam chara moden
Sarawak Workers Party ( SWP) minta perintah nengeri numbuhka baru Palan Latih Betanam Betupi (ATC) di sitak Kapit bepun ari palan nya udah ditutup di Seputain betaun- taun ke udah.
Presiden SWP Munan Laja madah, ATC beguna bendar lebih agi ngagai nembiak ba sitak nya belajarka penemu baru bekaul enggau pengawa betanam betupi chara moden.
“Sitak Kapit udah tebilang enggau buah dabai, buah isau, buah rian enggau ikan empurau.
“Kelimpah ari nya, baka di Sungai Sut, Kapit, sebansa buah rian udah ditemu chukup manah sereta udah direjister ba Opis Betanam Betupi ti dikelala enggau nama D171.
“Nya alai, dikena kitai ngangkatka produk baka tu, ATC meseti ditumbuhka baru di Kapit ditu,” pia ku iya madah ngagai pengarang berita, kemari.
Taja pan baka nya, ku Munan, nyema perintah nengeri numbuhka baru ATC tu ila, rayat di sitak Kapit mega patut landik nimbal pemansang nya.
“Kelimpah bisi saup ari perintah, rayat ditu anang enggai ngemeratka pengawa betanam betupi.
“Kebuah pia laban pengawa betanam betupi udah ditemu nyadi siti ari chara ke engkeman ngangkatka tikas pengidup enggau penatai pemisi rayat ke diau di menua pesisir,” ku iya madah baru.
Sebedau nya, Munan sekali agi madah, ATC meseti ditumbuhka di Kapit laban nya deka ngepunka pemujur industri betanam betupi ba sitak nya.