Malaysia-Kemboja ngemeran kerejasama rat mutarka isu menua
Kaban Parlimen Lubok Antu, Jugah Muyang ngena awak World Summitt Universal Peace Federation ke diatur di Seoul, Korea Selatan berandau enggau Menteri Luar Kemboja sentang isu bekaul 47 iku peranak Malaysia ditan di Kemboja, ensana.
Jugah ke bela ngulu program nya ke diatur 7 nyentuk 11 Februari bisi betemu enggau menteri ari Kemboja nya.
“Kitai ( Malaysia enggau Kemboja) deka naka alah bekerejasama mutarka isu tu enggau lengkas.
“Ngarapka sida ke ditan tu ulih mulai kediri ngagai menua enda lama agi,” pia ku iya madah nengah penerang media, kemari.
Dulu agi tu, maya aum media di Kuching, Kaban Parlimen Julau, Larry Sng mantaika berita nya ti madah- ka 47 iku peranak Malaysia ditan di Kemboja kenyau ari 11 Disember suba.
Ari penyampau nya, 44 iku peranak nengeri Sarawak.
Jugah ba penerang iya madah, kelimpah ari nya, iya mega andal perintah nengeri Sarawak enggau perintah besai ngatur kerejasama ke tegap mai pulai semua sida ke ditan nya.
“Kitai deka meda sida pulai ke menua enggau likun,” ku iya madah baru.
Ba pekara tu, Menteri Luar menua, Datuk Saifuddin Abdullah ba Wisma Persekutuan madahka perintah Malaysia diatu benung chakah ngatur chara mai pulai sida ke ditan nya.
Ku iya, naka kediatu (ensana) perintah Kemboja mega meri kerejasama ke manah sereta ngemendarka pemesari ari Kedutaan Besar Malaysia di Phnom Penh ngabas sida nya.
“Kitai bisi penerang ke pemadu baru bekaul enggau pekara tu kelimpah bala pengari kitai mega udah berandau enggau sida ke ditan tu lalu nentuka sida likun,” pia ku iya baka ke diripot siti berita online, ensana.
Ba perintah nengeri Sarawak, Kepala Menter Datuk Patinggi Abang Johari ensana, madahka perintah nengeri benung berunding deka nganjung pengar ngelawa Kemboja dikena ngemuntangka agi randau ngelepaska 44 iku peranak Sarawak.
“Sarawak semampai berandau enggau pengari ba Opis Luar Malaysia di Kuching bekaul enggau isu tu,” pia ku iya nengah surat berita maya ngabang Taun Baru China ngagai rumah Menter Muda Dagang Temuai, Art enggau Main Asal Datuk Lee Kim Shin di Kuching.