Raban nembiak patut mansik dulu sebedau nerima pengawa ke menua luar
Raban nembiak di Sarawak meseti bejejaga nyema ngiga pengawa ke menua luar ngambika enda kena tipu ti mai sida dalam sindiket ke semina deka begunaka sida, pia ku Menteri Dagang Temuai, Seni, Main Asal, Nembiak, Lumba enggau Main Datuk Abdul Karim Rahman Hamzah.
Nitih ku iya, naka ke diatu nadai pekara ulih digaga perintah Sarawak semina ulih meri jaku tangkan ari sida berindik ari isu ti nyadi bedau lama tu mayuh ngaul nembiak peranak Sarawak lalu iya semina ulih mesan peranak Sarawak ke bukai.
“Berindik ari teknologi penerang ke udah majak mansang diatu, kitai enda ulih ngemataka semua raban nembiak Sarawak ke bekereja di menua luar ti deka ngiga penatai pemisi ti tinggi. Kitai semina ulih ngarapka peranak Sarawak diatu bejejaga lebuh sida pansut luar ari nengeri tu,” ku iya nambah lebuh ti bejadi pengerami Taun Baru China ba indu opis Wushu Federation of Sarawak.
Abdul Karim nimbal tanya pengarang berita bekaul kes 44 iku peranak Sarawak ari 47 iku peranak Malaysia ti diatu benung ditan ba jil pe- lilih Kemboja ti dituduh udah ngadu judi ‘online’.
Ku iya, endang chukup sinu mayuh peranak Sarawak ti udah bekaul dalam kes tu lalu iya ngarapka nadai agi peranak nengeri tu kena tipu bansa tu baka 44 iku nya ke benung ditan ba jil ba Kemboja nya.
“Chukup sinu tetiap kali kitai ninga peranak Sarawak ke enda ngaga nama-nama tang ke menua luar ngiga batang pengawa lalu ditan ba menua luar. Nya alai peranak Sarawak, kelebih agi raban nembiak meseti mansik dulu sebedau ke menua luar sekalika pengaji sida nya nadai bisi rikod ngereja pengawa ti salah ba sebarang menua ti deka endur sida bekereja,” ku iya.
Bejaku bekaul kes 44 iku peranak Sarawak diatu ti bening ditan ba jil pelilih Kemboja, Abdul Karim pechaya perintah besai nengeah Opis Menteri Kaul Menua Luar deka ngatur naka ulih pekara ti patut dikena mantu sida ti ditan nya.
Tu berindik ari nadai mayuh pekara ulih digaga perintah nengeri ketegal nya bekaul enggau undang-undang menua bukai.
“Nyema kitai ( perintah nengeri) kin lalu minta semua 44 iku peranak Sarawak nya dilepas, sida endang enda kiruh ke nya. Dalam pekara tu kitai meseti bekerejasama enggau Wisma Putra dalam mutarka isu tu,” ku iya nerang.
Kelimpah ari nya, Abdu Karim mega andal mayuh pengawa ari sekeda gerempung lalu pia mega ari raban politik ti bebendar ngiga jalai dikena mutarka isu ngelepaska 47 iku peranak Sarawak tang iya agi kering madahka chara ti pemadu manah iya nya nengah perintah menua berunding enggau perintah Kemboja.